Chapchar Kut leh puipun dangte

Hei le, Chapchar Kut a lo hnai leh ta. Programme ngai bawk, kumin Chapchar Kut chu kut danglam takah chantir theih dan tur rawtna i han siam teh ang.

Fashion Show tihtawp: Chapchar Kut apiang deuh­thaw hian Fashion Show hi a awm ve ziah a, tute emaw tana sum siamna remchang mai a nih hlauh rukna riau ka nei. Model kan neihte pawh a ngai bawk an inlan a, fashion house kan tih ang pawh ṭhahnem tak kan neih tawh laiin heng nikhuaa show buatsaihtu hi chu a ngai deuh pet pet an ni.

Anthurium Festival leh thil danga kan hmuh loh rawn pho chhuah tur a awm tawh mang si lo. Mizo thuam pangngai ni chiah lo tlema tihdanglam leh Mizo thawmhnaw them an bel vena hrang hrang an rawn tarlan ṭhinte hi chu kan hmu tam ta bawk a, fashion show danglam bik an siam thei a nih loh chuan, “A dawt lehah chu nu bawk chu a lo lang ang a, chutiang bawk chuan a rawn inthuam leh ang,” tiin a chik deuh te chuan an sawi zuah zuah thei.

Concert tihtawp: Kum 10 pawh a la ni lo ang, Chapchar Kutah hian concert rawngkai hi kan nei tel ta a, hei hi mi tam takin Chapchar Kut an nghahhlelh chhan a ni.

Zai hi chu uar deuh deuh tur a ni a, concert anga kal pui hi chu kei chuan ka thlawp lo. Mizo zai pangngai leh ṭha hi chu mipuiin an lawm a; nimahsela Sap hla thluk ang tho sak a, band hrang hrang an han ko khawm hi chu, “Chapchar Kutah concert kan telh dawn,” tia kan pawmpui a nih loh chuan a kut zia lo a, western music platform kan siamna a ni zawk mah lo maw? Chapchar Kut tawp lama sahawna han siamte hi chu Mizo zai pangngai nen chuan a inhmeh viau a, western music ang thoa beih vak hi chu, “Lammualah i concert ang aw, Chapchar Kut tlai lamah,” tihna ang deuh a ni.

Half time show iangin: Super Bowl hi kan hria ang a, American Football final a ni. He hun hi American mipui chuan khawvela thil thleng ropui berah an ngai. Half time lai hian Super Bowl Halftime Show an nei ṭhin a, hei hi mi nazawng zai phakna a ni lo. Mi special deuhte an zai a, chutah pawh special takin an inbuatsaih a, hun special leh hriatreng tlak an nei ṭhin.

Kan Chapchar Kutah hi chuan, “Ani hi a zai khat tawh zai ve leh tawh se,” kan ti nge ni zai tur hi kan thei sem vak vak a, hei hi i sim ang u. A bikin Aizawla Chapchar Kut lawmnaah hi chuan Mizorama a ‘top’ tak tak thlang ila, chutah pawh hun hlu bik hi siam thiam ila a ṭha ka ti.

Ka rawtnaah chuan entirna han siam ila, ‘dar 3-4 hi hun bik a ni’ ti ila, chutah chuan Mizorama a thiam thlan mi 3 vel emaw hun pe ila, hla 3 ṭheuhte emaw han nei se. Chumi atan chuan zaithiam pawhin nidanga an zai liam puata pawisa an laka an kal leh nal nalna ang lo deuhin rawn inzir se, music track ni loin live ngatin ni se. Video uluk takin cover ila, “Chapchar Kut Hun Bik 2017-a performance chu hei hi a ni,” tia YouTube vela en laih laih tham law law hian rawn che se. Tunah chuan an inzai chhawk diat diat a, hmun danga an music track tho an hmang a, an kawr an thlak a ni mai a, ho ve tak chu a ni.

Thlala tur bik siam: DSLR Camera nei nazawng an chhuah khawm chuan Lammualah an khat mai ang! A chhuah chhawn lehna nei ho hi hmun dangah chuan accreditation an pe ṭhin a, chung mite chiah chu luh an phal ṭhin. Khawi pawl emaw member nih ve vang a, Facebook bak pho chhuahna nei hlei lo camera nei lian ho an tei suau suau chuan an hnawk. Ka sawi nawn leh ang hnawk­sak tham an awm. Chanchin­bu, website enkawl­tu, hmun danga pe chhuak thei tura hnathawkte leh thlala thiam pawla thlan bik 10 pawh ni se a tawk em em a ni. Tunah chuan Chapchar Kut hi ‘Photographer’s Meet’ a ang a, thla latu tur hi thlan bik mi 20 aia tam lo ni se a tawk viau lo maw?

- Lalremruata