I thisen thianghlim kha! (V Day pual)
I thisen kha ... la thianghlim tak kha - nangma siam a ni lo a nia! Siamtun a siam che khan thisen thianghlim tak a pê che a - chu chu i tâ liau liau a ni asin! Chu chu, Valentine’s day an tih - Pu Valentine-an a duati tana a hun ruat, a bituk, hriatrengna pualin February 14, 2017 hian Govt Mizo High School Hall khat tlatin ṭhalai ten thisen an pê nia!
Hmãnah kha, Rom lal ropui khan Lal Isua Krista kha a thisen a chhuahsak vak a nih kha! En teh, min chhandamtu a la ni zui - vànram kan luh theih phahna turin a lo tuar tawh. A thisen avanga chhandam kan lo ni dim diam tawh. Ngaithla teh, i thisen mamawh kha an tam asin! Damdawiina awm te saw! I thisen kha a hlu lutuk a nia aw ... Dáwn teh, hetah pawh, mi za chuang fé thisen pe turin an rawn kal duh a nia. I BP a sáng a, i pe thei lo a ni emaw, i hb a hniam vàng a ni emaw ... i rilrua pêk duhna thinlung tal pawh nei teh. Chu chu Lalpa’n a lo lãwm êm êm dáwn si! Lalpa làwm nan tal i thisen kha pe ve teh. Ani pawn kan dam nan nasa taka a tuar tawh kha - nang pawn tuar ve la ... mi dang te tan!
Mizo ṭawng in ziah dàn hi (mi/ mahse)
Vanglaini-a ka thawh tawh loh hnu hian thu ka ziak tlém ta hle mai. A thawktu, mi ṭhahnemngai tak takte inpêkna a ropui ka lo ti ṭhin. Mi tinina ni tin chanchinbu an chhiar tam ber a nih avàng hian ràl aṭang hian ka lo ṭang ve viau ṭhin. Ka duh khawp lohna, Mizo ṭawng ziah dàna kan hman sual fo ka’n rawn thai lang ve teh ang.
A bîkin ṭhalaite’n infiamna (sports) column leh Ṭhalaite Pual kan chhiar tam a. Kan ṭawngkam pawh uluk ila, a va ṭha dawn em!
Pakhatnaah: Mihring kum upat lam kan sawi dawn hian ‘mi’ tih hman tur a ni ṭhin. Entir nan, Wayne Rooney, kum 31-a upa tih hi a dik lo; kum 31 mi tih zâwk tur a ni. Thil nung sawi na’n Mizote’n an kuma hi ‘mi’ tiin kan sawi ṭhin. ‘He thing hi kum 20 lai a ding tawh,’ tih tur a ni thung.
Mihring kum upat lam sawinaah kum kan lo dah ngai lo a, ‘mi’ tiin kan lo sawi ṭhin. Tûna chinah i chhunzawm tawh lo ang u.
Pahnihnaah: Mahse! ‘Mahse’ ziah dàn chi hnih kan nei ... tih hi Vanglaini chanchinbu ziaktute hian hre teh u! In tidik lo fo mai! ‘Sanga chuan Manchester United chu zawm duh viau mah se, a hnãwl leh si a.’ Emaw, ‘Sanga’n Manchester United chu zawm a duh viau a; mahse, contract thil avangin a zawm leh ta lo a,’ tih hi thil hrang hlak a ni. Mahse leh mah se hman dànah hian i fimkhur ang u.
Sentence laklawhah zawm loh tur; sentence ṭan nan erawh zawm tur tih hi.
- Zirsangkima