IN MANGAN VE LOH VANGIN IN NGAIHTHAH EM NI?

Ni hnih khat oil phur kal thei lo se, mipui kan mangang nghal a, petrol pump-ah nileng kan intlar put tawh chuan, a tuk aṭang chuan lak tur a awm lo nghal. Thil ti thei deuhin Coupon hmangin an la zal zal a, mipui chu kan khawro nghal a ni mai.

Hmanah khan PC Party-in Press release siamin "Kum 1980 chhoa Brig. T Sailo-a kaihhruai PC sorkarin Vairengtea tuialhthei leh diesel dah khawlna (oil depot) a siam, ṭangkai taka hman tawh PC sawrkar loh hnuah hlamchhiah zui a nih tak tlat avanga vawiin thlenga tuialhthei dahkhawlna pawh la nei lo dinhmuna Mizoram dintirtu, Congress leh MNF party te hi Mizoram hmasawnna ti­ṭhuanawptu lian takah PC Party chuan kan ngai a ni.

Mizoram leh Cachar ram inkarah emaw, Cachar tual­chhungah emaw harsatna a lo thlen pawha ṭangkai taka hman tura PC sorkarin Manipur leh Tripura state te nena inpawhna kawng­pui a lo sial te, Vairengtea tuialhthei dahkhawlna a lo bun te kum 35 chhung sawrkarna inchelh chhawk ṭhinten an hlamchhiah avanga hmasawnna kawnga bul ṭan ngaia Mizo­ram a la ding fo mai hi PC Party chuan Mizo hnam mualphona lian takah kan ngai bawk.

Hetianga Cachar leh Mizo­ramin eng emaw harsatna kan neih pawha petrol leh diesel-ah buaina zâkhua kan tawh theih hre renga lo inhmakhua lawk nana PC sawrkarin kum 35 kal taa oil trip 300 chuang dahkhâwlna, Vai­rengte daia oil depot a lo bun tawh hluihlâwna awm mek hi chhuanlam dang siam lova, a rang thei ang bera thawm ṭha leh vat turin PC Party chuan Mizoram sawrkar kan phut thar leh a ni" tiin an au chhuak tawh a. Hma lak zui thawm hriat a awm lo.

Tuna Oil Depot chhete kan neih lah hi a hlui tawhin hman tlak a ni tawh meuh lo niin a hriat. Oil phur motor thleng pawh hi Challan ti felin an chhuah nghal zung zung zel niin a khaw miten an sawi.

Mipuite mang­anna hian min kai tho zo ngang lo tihna em ni? Hengte hi a ni lawm ni, ram hmangaihtu dik tana hmalakna tur chu? Kum 20 chhung chu kum tin vawi 2/3 kan buai ziah a, lir thei lah a tam tual tual bawk si.

A harsa lo ang mawle, Airport lei chim hma daih khan oil dah khawlna hi chu siam daih tawh tur zawk asin. Mipui mangan laia in mangan ve loh vangin in ngaihthah mai mai a ni lo maw?

- Lalrinliana Colney