BJP an pawimawh dawn

Kum 2018-ah Mizoramah Assembly Inthlan a awm dawn a, mipui nawlpui hian Congress leh MNF inbeihna tur a ni tih hi kan hre fur chung hian, kan hriat tel loh chu BJP hawi lam a pawimawh dawn tih hi a ni.

Hetia han thlir thuak chuan Congress hian sorkarna hi an la siam leh mai hmel a, MLA an neih sa zingah hian nuamsa taka tling nghal thei hi mi 10 hi chu an nei sa angin a ngaih theih a, a bak hi chu an inchuh ve fe tho ang chu. MNF hian hma an sawnna sawi tur hi a vang hle mai a, Congress tihsual chan ringawt hi chuan sorkarna siam a la harsa dawn a, anmahni lam hian eng emaw duan chhuah an neih a ngai.

ZNP leh MPC lam hi chu tun dinhmunah chuan sorkarna siam thei tura rinkai an la ni lova, mihring chu ngah viau mah se a ṭha berah MLA pahnih-khat bak hi an mal din chuan beiseiawm a ni lova, chu pawh chu a harsa lam a nih hmel.

BJP kan tih chhan chu sum an ngah vang hi a ni. Sum hi engmah a ni lo emaw kan ti mai thei a, sum hian inthlanah hi chuan thil a ti thei tak zet zet a ni tih hi inthlana inhnamhnawih thuk apiangin an hre chiang ang. Mizoramah hian BJP hi an sorkar dawn tih ka sawina lam a ni lova, anni inrawlh dan hian sorkarna hmel hi a thlak theiin a rinawm dan kawng tam tak a awm ve tlat.

BJP leh MNF-te hi North East De­velopment Alliance hnuaia thawk dun sa an ni a, in iai tawn miah lo hian thawk dun ṭha hle hle se Mizoramah sorkar siam theihna chance an nei. BJP hian pawisa an nei a, MNF lamin mihring an nei bawk si a, chu chu an kal kawp tir thiam chuan tu emaw thusawi thiama innghat ngawt lo, hmanlai history leh sentiment lama innghat ringawt tawh lo hian MNF in ṭan chhan an nei dawn a ni.

Chutihlaiin MNF hi an hmanhmawh hret a, “Party malin kan ding dawn,” tih an puang dum dum a, party mala din chuan beisei tur an nei lovah a ngaih theih a, BJP nen an inkawp fuh erawh chuan an sorkar theih hial a rinawm a, nimahsela Hindu nena sawi zawm BJP nena inzawm chu MNF tan chuan a harsa ve deuh dawn bawk si a, hetiang rel thiam mi thluak ṭha an mamawh a ni.

- Laldinpuia Hmar