Two Wheeler khalhtute kan fimkhur a ngai e

Pisa kaina Dur­tlang lamah daih a awm avangin kan veng Salem Veng aṭangin ni tin 'Lirthei ke pahnih nei'-in ka kal ṭhin a, kawng a thui bawk a, thil hrang hrang kan tawng ṭhin. Chung zinga ka ngaihmawh deuh chu lirthei ke pahnih nei khalhtute hi kan ni.

Kei ngei pawh lirthei ke pahnih nei hmanga ni tin chhuak ka ni ve thoa, tlan chak chi ka ni lo bawk nen, theihtawpin ka fimkhur ve ṭhin, mi tam tak, fimkhur tak leh polite taka lirthei khalh an awm. Ṭhenkhat erawh an fimkhur lo ṭhin hle mai a, kawng kawiah pawh lehlam aṭangin lirthei dang an rawn tlan em tih pawh ngaihtuah loin an hmaa lirthei tlan an lehpel pawp mai ṭhin hi chu! Kei vala hi ka lo ip chawih ṭhin.

Engpawhchunise, chu chu an nunna thu a ni a, chesual pawh nise a tuartu tur chu anmahni tho alawm, kan ti pawh a ni thei, mahse, midang harsatna siam zawnga lirthei khalh hi an la tam viau tho mai.

Kawng chep tak kara inzeh hram hram tum lirthei ke pahnih nei khalh zingah kan la tam. Sim a hun e. Ṭhenkhat phei chu rem leh rem loah kan inzep hram hram a, midang hmaizah lek loa midang intlar ṭhap tlanpela va inzep hram lah bo lo. Traffice jam karah pawh awlsam taka kan duhna hmun kan thlen theihna tura lirthei ke pahnih nei khalhtute hian traffice kan ti jam ve fo a nia!

Tin, kawng kan theihna hun miin an nghak hram hram a, kawng kan tir mai hi kan harsat ṭhin. Hetiangah hi chuan taxi driver-te hi an entawn tlak ber awm e.

Keini lirthei ke pahnih nei khalhtute hi chuan kawng kan tumte hi kan kian ngai meuh lo. Kian ṭhin kan awm, kan ti a nih pawhin an tlem viauin a rinawm. Hei hi 'No Honking City'-a khawsa lirthei khaltu tam ber kan harhchhuah ṭulna pakhat niin a a lang.

Pathianni leh zan thim thet thetah lirthei ke pahnih nei khalhtute hi kan tlan chak zual niin a lang. Zan thim hlima tlan chak tak tak hi chu tlema lo 'kam nam' tawh an ni, tiin ṭhenkhat chuan an sawi. Ka va hnim chiah lonaa chu a dik ka ring.

Pathianniah hian chak tak taka tlan hmuh tur an tam zual. Kawng a 'free' deuh avanga chak taka tlan pawh hi sim ang u. Chak takin kan tlan fua fua ang a, kan insu fua ang a, kan thi fua fua ang tih a hlauhawm em mai.

Hetia ka sawi duah avang hian lirthei ke pahnih nei khaltute zawng zawng kan chhe ta duai e, kan polite lo e, tihna a ni lo. Amaherawhchu hetianga fimkhur lo taka khalh ṭhin hi eng emaw zat an awm tih erawh min pawmpui ka ring e.

Chak takin kan tlan ang a, a hun hmain kan 'thihna' hi kan va umpha ang tih pawh a hlauhawm alawm mawle!

- Puia, Salem