SAMARITAN RIANGVAI RUN FR. KT. KHAWLA (L) PUALIN

Samaritan Riangvai Rûn Father KT. Khawla hi Pu Raltawna (L) leh Pi Khuangziki (L) te fa niin, kum 1940 March ni khatah Hnahlan khuaah a lo piang a. Unau pasarih leh fa panga a nei.

Damdawi inah : Khatia kal na avanga damdawi ina a luh khan, keini a ṭhenawm khawvengte leh Riangvai Rûna chengte chuan thi theia kan ngaih loh avangin dam taka lo haw leh mai turah kan ngai a. Pathian tih lohah chuan kan rin ber a ni asin maw le! Tun aṭang chuan Dt.5.2.2017 hi kan hre reng tawh ang; a chhan chu Father-in van kohna chhanga min hawsan ni a ni si a.

Father malin a awm lo : Father a lo chauh zual tâk deuh hnu, dialysis an tih dawn ṭumin dialysis room-ah ka va lut ve a. Ṭawngṭaina te ka neih hmain Sam 46-na thu, “Sipaihote Lalpa chu kan hnenah a awm a, Jaboba Pathian chu kan kulhbingsang a ni,” tih ka sawi lai chuan Father chu a lo ṭap a. Ṭawngṭaina ka neih zawh chiah chuan Fak hla thu Kristian Hla Bu No. 435-na kha ka rilru-ah a lo awm a, “Hlau suh, ka awmpui che, Rangka eng zam hian... Ka kalsan lo vang che malin i awm lo’ng a ti” tih hla kha. Tichuan, dialysis ti ve dang chhungte leh Riangvai Run Home Mother Pi Hmingteite nen innghahna room-ah ṭawngṭairualna te kan nei a, ka hla dawn chungchangte dinga sawiin, ka ta tura lo kal ni lovin, Father ta tur zawk nia ka hriat thu leh, amah ka ṭawngṭai zawh chiaha lo kal a nih avangin a chiang riaua ka hriat thute ka sawi ve a. Thihna hlim kawr ruamah khan Father hi malin a awm lo tih hi rinthu mai a ni lo, Lalpa kan lawm e.

“A-pa, lo haw rawh”: Kum heti zat lo ni ve ta chu mitthi lumennaah hian ka lo kal ve nual tawh a. Mi lung no ka nih vangte pawh a ni ang mittui tlak zawih zawih chang ka nei fo mai. Father ruang kan lumen zan zet chu a mi khawih dan a dang daih mai! Lengkhawm zai a ni emaw, ṭhalai zai a ni emaw khawvar thlenga zaikhawm boruak ṭha em em mai te kha a va ropui em aw! Thlaraumite an zalen a, thu leh hla leh lâm a tla ṭha takzet. Chutih laiin kei ve chu khawvar lam hnaihah chauh ka zai tui thei, a chhan chu, rualbanloten an pa ruang an kil a, a biang leh a lu-ah te ngaina taka chul chulin, ṭah hla thuchham an thiam theih tawp chhuahin, “A-pa, lo haw rawh,” an ti renga ka zai tui thei thlawt lo. An ena an ko va a ngawih reng si avang khan an kiangah awm mah se, an hnenah a lo haw lo tih an hrethiam ve niin a lang.

Ṭawngtheilote an ṭap pir per a, kut ben leh awmze nei lem lova au chauh thiamten tlaivar zakin zaikhawm min ṭawiawm bawk a. Home Mother ber pawh chuan naupangte ang bawkin “Ka pa, ka pa,” tiin a ṭap mai bawk si a. Ka ngaihtuah zawng ringawt pawhin ka ṭah a la chhuak. Mitthi lumen ka kal tawhna zawng zawngah mi la dek/ khawih ber awm e.

Seling tlâng a ngui ruai : Father ruang chu ama thlan ro-ah ropui taka thlah liam a ni ta a. In chhung leh khatna neih vang ni miah lova khaw hrang hrang aṭanga lo kalte khan Father an va chawimawi tak em! Ṭhenawmnu nihnain lawm thu ka sawi e. Khaw chhung mi tin mai hian Father kan sawi a, Rickshaw-a chuangte pawhin an sawi a. Seling dâi reha a ṭhenawm khawvengte phei chuan kan ngai zual a ni a dik tak chuan. Ar note, an nu muin a laksak daih hi kan inchan a, kan cha-vaiin kan khua a har vawng vawng a ni.

Tlai némah ka pa huan tlângah ka chho va, ka van Pa leh lei pateho ka koh pawlh nawk nawk mai a ni. He Seling, New Cutting (Zero Point) Veng/ khua dintu, ka pa leh ṭhenawm nu leh paten mual min liamsan zo ta. Father Pu Khawla a la dam lai kha chuan anni awm loh pawh hi a lang em em tawh lo asin maw le! Chhiatni ṭhatni kan tawhin ‘pa’ chan a chang ṭhin, Father hmun ruak hi a va zau em! Home a chengte pa chauh a ni lo va, keini dâi reha chengte pa pawh a ni ṭhin si a. Krismas leh Kumthar nikhua-ahte ṭhenawmte huap zovin ruai a siam ṭhin a, man lovin a duh apiangin kan ṭheh ṭhin. Miin silhfen an pek khawmte chu anmahni chauha chan tum bik lovin ṭhenawm naupangte min semin, min thlan tir ve ṭhin kha a ni a. Mi rethei té té kan nih hlawm avangin sum kan tlakchham changin a hnenah kan kal ṭhin a, kut lawngin min haw tir ngai lo. Lalpa hian engati nge maw min laksak daih le?

Father rawngbawlna huang dang: Samaritan Riangvai Runa a enkawlte bakah hian, khaw 15-ah rualbanlo chanhai mi 52 hnenah thla tin châwmna pawisa a pe ṭhin a. A in pawh chungkaw 4 (pali) lai a thlawnin a luahtir bawk a ni. Samari mi ṭhaten silh leh fen an pekkhawm an fate hak sen lohte hi ka u Thankima nen phur chhuakin, hmar tlang dunga MHIP te kuta dahin anni’n mi retheite hnenah an lo sem ve leh chhawng ṭhin bawk a ni.

Father KT. Khawla chanchin sawi hi a nuam kan ti a, amah ang Pathianin Mizote min pe hi Pathian chungah pawh lawm thu kan sawi a. Amah ang hi an vang ngawt ang, mi bik ni tur leh ngilnei tura Pathianin a duan bik kan ti lo thei lo.

Mi thianghlim kalna kawng hlui kha zawhin, Kan hmaah Lalpan a lo hruai ta a ni.

He leia a lo thiltih tawhte leh a chan­chin ropuite erawh chu Pathianin Zofate tan a hnutchhiah e.

Father, thlamuang takin chawl ang che.

- RTC Lalduhawmi