Bân theih loh politician

Vanglaini, Feb­ruary 7-a Editorial kha a ṭha ka tiin, sawi chhunzawm reng tlak niin ka hria. Nalanda Institute of Advance Studies (NIAS) chungchanga Labour Employment & Industrial Training minister leh Mizoram Youth Commission chairman ban chung­changah a hmain chief minister chu an bân dawn loh thu a sawi a, Vanglaini editorial hian politician-te hrem ve theih loh emaw, ban ve theih loh ang maia an hotuten an chhan zel ṭha lo a tih thu a sawi a ni.

Tun hma aṭang tawh khan minister ten an chanpual dept chhunga dik lohna deuh a awmin, mipui lungawi loh chang a awm fo a, chungah chuan a changtu minister ten an chanpual chhunga harsatna leh thil dik lo awm kha an mawhphurhnaah an ngai lo ni ngei turin bân an tum loh mai bakah, an hotute ngei pawhin an chhan zawk fo mai.

Minister-te hi an chanpual dept-a thil dik lo a awm apiangin bânna thehlut zel se ka tihna a ni lo, thil ṭhenkhatah hi chuan a changtu minister te bâng se la, buaina ziaawm theih zawkna tur leh thil a kal pangngai theih zawkna tur a awm fo ṭhin. Chutiangah pawh chuan namen loa an nawr hnuin, 'nawr vang ni loin' tih hmangin an bânna an thehlut ve hram a; mipui ngaihdanah chuan 'Nawr vang a ni' tih a ni tho tho. Nawr lo se, bânna an thehlut hauh lo ang.

Ram changkang zawk, miin an mawh­phurhna an hriat chian zawkna hmunah chuan, road accident lian tham a thlen ten, a changtu minister ten bânna an thehlut a, khatiang thil thleng kha vên theih a ni a, chutihlaia chhiatna a thlen tho si avangin an mawhphurhna liau liauah an ngai ṭhin. Keini ramah ve thung hi chuan kan mawhphurhna hi kan hre lo hle a, mipuiin bâng se kan duh ngawih ngawih pawh hian bân an tum loh mai bakah, an hotute nen lam an chhan zel mai hi a ṭha lo hle.

Minister leh ram hruaitu nihin mawh­phurhna a ken in­hrilhthar awm lem si lo hian, a chhan leh vang chhui chiang hmasa hauh si loa thlavang inhausak ringawt te hi kan chîng a, rilru puitling zia a ni lo.

Eng party hruaitu emaw eiruk thubuaiah chhui chiang tura ngenna a luh tein, an party-in a eng amah hmain an thlavang an hauh a, an thinrimpui lek lek mai ṭhinte hi dikna duhna leh, dikna laltirna tumna zia a ni lo. Hetiang thubuaiah hi chuan, an lo fihlim a nih tak leh chhuang taka lawmpui a, an lo tidik lo a nih chuan party ang hial pawha ram mipuite laka thupha chawi hi mipui tling zia, mawhphurhna tak tak hria, ram hmangaihtu zia zawk a ni.

- Lalchungnunga Ngente