Titia Distinction

Mizorama tunlaia sawi hlawh tak chu ṭawngkama distinction, titia distinction hi tu sawina nge a nih? tih hi a ni.

He ṭawngkam aṭanga thil lo lang nghal chu kan rilru hian tinzawn chu a nei a, chu chu a nih leh nih loh lam chu sawi ka tum buai ve lova. Kan rama kan hruaituten an thusawi an um phak lo fo mai chungchang hi sawi ve hrim hrim a ṭha.

Tun hma aṭang tawha thudik lo hrilh ṭhan tawh mipuite hian kan politician te hi kan ring ngam ta lo hle a ni tih a lanna chu dawt ngialngan nia lang an sawi pawh hian huat enah kan en tawh tlat lo hi a ni. Hei hi politician te vanneihna angah kan lo ngai palh ang e, hei hian kan ram chhiatzia a tilang tawh zawk a ni. Dawt min hrilhtute pawh kan haw tawh lo a nih chuan he ramah hian dawt sawi a tam tawh hle tihna a ni.

Vawi duai lo min tiam thlawn tawh a, Thangkura Drama lama Vansang Election campaign lama sawi ang lek khan thil awihawm loh pui pui sawi hi tlin pui theih a la nih hi chuan he rama chengte pawh hi tunge nge mawh kan nih le? tih hi kan inen a ngai ve tho a ni.

Min bumtute hian min bum min bum thei a nih chuan an thiam loh a nih rualin kan thiam loh pawh hi a ni tel ve tho lo maw? tih hi kan in zawh a hun tawh. A buma min bum nawn reng chuan kan thiam lo ve bawk a ni tih hriat a hun.

Tunlai hian kan ram Minister zingah pawh pawisa tamzia sawi reng mai, pawisa pawisa pawisa ringawt hmanga mipui rilru hruai theia in ngai emaw tih tur an han pun belh zel hi a vanduai thlak a ni.

Tuna a lan danah hi chuan pawisa leh pawisa ringawt kan in hrilh hian mipui hian nuih enah kan en a, nakinah chuan thinrimna mitmeng nen kan en hunah chuan pawisa sawitute phur ala rit dawn a, a taka pawisa awm si lo a nih hian a pawi a ni.

Health Minister khan sorkar pawisa neih loh vanga hna lak theih loh a sawina kha a la rei lova, titi ringawta pawisa tam hi chu source hrang hrang aṭanga kan puk khawm mai mai a lo ni si.

He ram hian titia distinction pass mai mai ni lo, mi rintlak tak kan mamawh e. Party hrang hrangah hian a sawia sawi chi, titi chi hi chu an tam mah mah zawk tawh a nih si hi.

- Lalrinpuia