Aizawl traffic jam hi

Aizawl khawpuiah a ni telin lirthei a pung a, traffic jam-in kian ni a nei meuh tawh lo zawng a nih hi. Engtia tih ziaawm tur nge tih chu ngun taka ngaihtuah a ngai ta hle mai.

Traffic jam lutuk tih ziaawm nan taxi chu ṭhuang thumin an intlan chhawk mek a, heti chung pawh hian a la jam viau tho mai. Tunlai phei chuan Bible House kawt kawng­pui a khik avangin upper Khatla-ah two wheelers bak a tlan theih lo a, mang­anthlak tak a ni.

Pisa kai lai leh ban lai phei chuan a tlan hleih theih loh ta hial mai. Two wheelers lah a pung chak nasa mai si a, traffic jam karah inhnawh luih tlat tumte'n an ti jam nasa bawk. Heng two wheleer khalhtute pawh hi khawng deuh hleka enkawl an ngai. Double overtaking chingte hi hrem zel tur pawh an ni ang.

Taxi intlak chhawk hi ti zel tho i la, lirthei reng reng sorkar motor pawh nise num­ber kawpkim leh kawpkim lo intlan chhawk hi a hun viau tawh a ni. Hemi ti tur hian minister leh MLA te, Chief Secretary leh a tlukpui ho chauh hi thliar hrang lo i la, a bak zawng hi intlan chhawk tir ni ta se traffic jam chu a ziaawm phah deuh ngei ang.

Traffic jam-na ṭhenkhat leh chu kawng­pui kam ring chunga two wheleers workshop tam lutuk hi a ni pakhat. Heng workshop pawh hi khuahkhirh deuh a, kawngpui nek chep zawnga workshop siamte hi hmun dangah siamtir dan ngaihtuah a hun tawh khawp mai.

- Lalkhirhvela