Sorkar hnathawk hlawh leh sorkar

Mizoram sorkar chuan a hnuaia sorkar hnathawkte thla bi hlawh chu eng emaw zat a ba dawn a, a chhuhsak dawn lova, a batin a ba dawn. Chu chu sorkar sum dinhmun a ṭhat hunah a pe kir leh dawn a ni. 

He ruahmanna hi Covid-19 rawn irh chhuah liau liau a nih avangin mimal takin Finance Minister Pu Zoramthanga emaw, a kaihhruai MNF sorkar lam emaw dem tur a ni lovang, mahse mipui hian thil awm dan hi an zir chian ve zel avang leh, thil kalphung hi internet kal tlanga an rawn chhui chhuah ve zung zung tawh avang hian ṭawng fimkhur nan leh inzirna atan hman theih a nih chuan a lawmawm ngawt ang.

Kan Chief Minister hi Mizopa kawm nuam leh nelawm tak a ni tih hi a kawm ve phak lo te pawhin kan rin dan a ni a, pa inngai tlawm leh kawm nuam tak a ni ngei ang a, mahse pa ṭawng nuam ti ve tak, pa titi thiam leh a chang chuan pa ṭawng duhthawh ve bawrh bawrh chi a ni tih pawh kan hre tlang tawh ang. Chief Minister a nih tawh hi chuan a ṭawngkam hi tun aiin hawihawm hret se, insum ta deuh bawk se chu tun hnaia boruak awm ṭhenkhat pawh hi a awm lovang. 

Chief Minister kal chhuak ta Pu Hawla kha District thar duhin Saitual mipuiten an lo hmuak kha, "Phût nei in hmuah," tiin Mizopa leh Mizopa kha thangtlawm takin a chhuah tawh a, khatiang hmuk hmuka in ṭawng khum lam ni si lo, tun anga Chief Minister speech-a uar uchuak tak ni si lo hian thusawi theih ni se a ṭha khawp ang. 

Kan budget a sawi­naah khan kan Chief Minister hian, 'Duh leh kan kang ang a, duh leh kan bai ang,' tiin budget kha MNF ni ve lo tana ngaihthlak hrehawm turin, MNF budget tur ang mai khan a sawi a. An ta liau liau, an duh duha an hman kual vel theih ang maiin a lo sawi hial tawh a ni. Party budget ni lova mipui budget a nih tichiangtu chu Covid a lo thleng ta chiah chu budget chu "Duh leh kan pûk ang," tih a lo ngai ta chiah a, sorkar chuan sorkar hnathawkte hlawh a puk/ ba ṭhen dawn ta a ni. 

Sorkar tan hian mahni hnathawk te hlawh hman pûk anga thang tlawmna hi a tam lovin a rinawm a, chutiang dinhmuna kan tluk luh chhan chu duh leh bai thei, duh leh kang theia kan sawi kan budget lama kan beisei pawisa a lo kal tlem si avanga buaina a ni. Sorkarin a hnathawkte hlawh a hmang pûk (laksak a ni lova pek kir leh tur a ni) tur hian kan ram sum leh pai dinhmun, kan sorkar leh a hnathawkte inkar pawh a ti chiang chho tawlh tawlh a, budget pawh kan hre chiang chho zel a ni. 

Covid-19 hian kan nihna a phawrh lang zel bawk a, kan awm dan pawh a rawn ti chiang chho zel a ni.