Zirna nei lem lote damdawi chawh ei

Mizote hi induhsak liam liam hnam kan ni a, hmanlai aṭangin chawhmeh leh hmuihmer ṭha deuh kan neih chuan unau leh ṭhenawmte kan suah a, bai tui tak kan siam ṭuma kan han insuah liam liam ṭhin te hi Mizo mize duhawm tak zinga mi a ni. "Sem sem dam dam, ei bil thi thi" tih thinlung pu tlat hnam kan ni hi a vanneihthlak ngawt mai. Chhiatni ṭhatniah pawh engkim kan tih ho del del te hi hnam dangte awt miah loa min siamtute zinga mi a ni. Ni e, thil ṭhaah chuan tute pawh duhsak em em tur a ni a, a hlu em em ṭhin.

Induhsakna kan inpek zingah erawh chuan induhsakna ṭha lo deuh pakhat a awm a, chu chu damdawi kan inchawh tawn ringawt ṭhin hi a ni. Mihring taksa peng hrang hrang hi siamtu-in min duan danah hian inkaihhnawih tawn vek a nih avangin mihring damlohna pawh hi chhan hrang hrang vang a ni thei. Damlo pakhatin a natna atan a ngeih em em kha amah ang deuha na ve khan a ngeih ve kher lo thei a, ngeih a hnekin a chhiatpui phah thei zawk a ni. Damlo hi an inang lo a, damdawi taksa chhunga a chet kual velna atana pawimawh zinga mi pum leh ril dinhmun inang lo tak tak, thin, kal leh lung hnathawh dan pawh inang lo tak tak an awm thei a, natna pawh chi khat aia tam daih damlo pakhatin a nei thei. Heng kan tarlan bakah hian taksa peng hrang hranga harsatna avangin pawn lamah chu na chu a rawn lang chhuak a, a tlangpuiin luna, pumna, kawngna, taksa kham, thawhhah leh kawng hrang hrangin a lang chhuak ṭhin.

Hetiang a nih avang hian damlo enkawl thiam doctor kan mamawh a, doctor chuan a zirlai aṭangin mihring taksa peng hrang hrang leh harsatna chi hrang hrang lo awm thei te, damdawi hman tur hrang hrangte leh mi zai thlengin a zir a. Graduate ni tur pawhin kum 5 dawn lai zir a ngaih bakah u te hnungzuiin kum khat taltawp internship tiin a tei ve lauh lauh a ngai ṭhin. Hemi bakah hian a bika thiamna, specialist, super specialist thleng ni tur phei chuan a doctor zir chhung ringawt pawh kum sawm chuang lai a ni thei. Hah taka zirchhuak doctor-ten an hman tur damdawi, tunlai science thiamna hmanga siam (allopathy) lam zirbingna (pharmacy) pawh graduate ni turin kum li bakah damdawi siamna industry-ahte training neih ngei ngei a ngai a, hospital training-te pawh an awm ṭhin. Peng hrang hranga zirbingna awm leh nen kum 10 bawr vel tho zir a ngai ve bawk. Heti taka khirh leh kalkawng thui, miin thi leh thau pawlha an zirchhuah damlo enkawlna lama an thiamna hi kan zah sak a ngai em em a ni.

Mahnia damdawi lo inchawh, ṭhen­awm leh unau hnaivaite damdawi chawh ei leh zirna ziktluak ni lem loa zirchhuakte thurawn avanga ngampa taka damdawi kan ei a kan hmang mai ṭhin hi chu kan sim hmak tur zinga thil awhawmber pakhat a ni awm e.

Tunlaiin kan ram khaw hrang hrangah khawilai zirna in aṭanga zirchhuak nge tih hriat mang loh doctor ve tak tak an tam hle niin a lang. A ṭhen phei chu court case nei lai mekte an ni awm e, heng kan ‘daktawr’ ho hi kan zir ngun leh hriat chian a pawimawh em em a ni. Vai ram khawi khawiah emaw an zu kal a, hun reilote chhungin eng eng degree emaw an rawn paipawn haw a, an rawn ‘sipisialis’chhuak viau mai ṭhin a ni awm e, tak tak ni maw... mi ṭhenkhat chu ralchhana inziak tling an awm te zu han ti a! Anmahni insawi leh ngaihdanah chuan an ṭha in an thiam ve viau te pawh a ni thei e, tin damlo tan pawh an ṭangkai ve viau maithei. Hetiang mite chunga rinna nghah leh nghah loh chu mitin mahni zalenna a ni ngei a, mahse miin a zir pawh zir theih hma hauha nasa taka an inbuatsaih, hah taka an beih rah liau liau avanga thiamna nei doctor-te leh an thawhpuite nge kan rin anga hetiang mi hi tih chu inzawh nawn fo a duhawm hle.

Tuna kan tarlan tak (alternative medicine) doctor-te hian damlo enkawlna atan anmahni tihdan bik leh hman bik damdawite an nei ṭhin a. Mahni system chauh hmanga damlo an enkawl a nih chuan lo buaipui ve chiam vak chi pawh a ni lo. An zir ang, an tih tur an ti angah ngai ve mai ila, dampui viau te pawh an lo awm ve a nih chuan a lawmawm lamah ngai ang. Mahse hetiang doctor-ho hian tunlai science thiamna hmanga siam damdawite (allopathic) an hmangin an chawh ve vak ṭhin nia sawi a awm! Hei hi thil pawi em em chu a ni, damdawi mum pakhat te pawh hmuchhuak tur hian sum leh pai vaibelchhe chuang sen a ngaih ṭhin bakah, thiamna thuk zawk leh hun a mamawh nasa em em a. Mihringah leh ranah te kim thei ang bera damdawi hnathawh hrang hrang, a ṭhatna leh ṭhatlohna khaikhinin zirchian a ni ṭhin a ni. Damloteah hman phal a nih hnu pawhin zir zui reng a ni ṭhin; ti khawp hian kan tunlai damdawi (allopathic) hman chungchangah hian fimkhur a ngai hle zawk a ni.

Hetia tunlai damdawi an lo chawh ve vak hian nghawng ṭha lo tam tam damloteah a thlen thei a, chutiang zinga langsar zualah chuan damdawi a hmanna ni loa hmanna a tihluar a, hei avang hian damdawi nghawng ṭha lo tak tak damloteah a awm phah thei, hei hian damlo taksa peng hrang hrangah harsatna dang lian zawk tam tak a thlen thei a ni. Chawp leh chilha nghawng ṭha lo lang chhuak nghal thei a awm rualin a tam zawk chu a tira a lan nghal mai loh avangin damdawi nghawng ṭha lo zinga Type D (delayed) adverse effect an tih a thlen thei a, hun lo kal turah damlo in a tawrh phah thei a ni. Damdawi ṭhenkhat raipuarin an hman a, naute tana hlauhawm a ei phei chuan naute piansualna a thlen thei bawk. Hei bakah hian a nihna lo tura natna hrik chikhat bacteria thattu ‘antibiotics’ te an hmang ve ṭhin ni awm a ni a, hei hian damlovah kha damdawi kha a hnu hun lo la kal turah hnathawk thei lovin (antibiotic resistant) a siam thei. Hei hian hun lo la kal zel tura damlo enkawlna lamah nghawng ṭha lo tak a neih theih avangin a pawi thui thei hle a, khawvel pum ang pawhin antibiotic resistance hi buaipui a ni.

Nghawng ṭha lo tam tak zinga tarlan hmaih miah loh tur chu a lo thlawna sum senralna a ni thei, eng eng emaw doctor ho hi thingtlang lamah hian an tla na duh phian lehnghal; thingtlang mi harsa ve tak takte sum, a lo thlawna luan raltirna a ni thei bawk, hei hi a veiawmin a ngeiawm em em a ni. Zahawm hmel fahranin doctor an inti a, khawl mak pui puite an keng ṭhin te an ti a, eng khawl tak ni ang maw, thingtlangah na na na chuan an lo ring ve zel bawk si a ni awm e.

Ṭhenkhat phei chuan allopathic medicine chu an kalnaah kengin an zuar nghal te an ti a, hei hi tak tak a nih chuan Drug & Cosmetic Act 1940 leh Indian Medical Council Act 1956 hmangin na taka hrem theih a ni. Consumer Protection Act 1956 hmang pawhin hremna lekkawh theihna a awm bawk. Mizote hi lehkha ziak leh chhiar thiamna lamah chuan kan sang viau a, fin pawh kan fing viau, mahse fin lohna deuh pakhat kan neih chu miin ṭha a tih ang apiang tak tak emaw tia bawh ve nghal vak mai kan ching hi a ni. Chumi zingah chuan tunah kan sawi tak damlo enkawl thiam inti doctor tam tak hi zirchiang hmasa phawt zel ila.

Traditional Systems of Medicine hrang hrang zirchhuak (AYUSH) doctor-ten Allopathy damdawi an lo hmang ve chiam mai ṭhin pawh a nghawng pawi thui theihzia hriaa kan doctor-te (Medical Council) pawhin duh loa nawrh an lo huaihawt hial tawh lai a, a lehchhawng, hetiangho (alternative medicine) hi rin tur nge rin loh tur tih hi zir chhuah tum zel ila a va duhawm tak em. Damdawi i hmang dawn a nih chuan a nih dan tur thlapin hmang la, a hun taka hmangin a ei zat tur ang thlapin ei ṭhin ang che.

- Dr. C.Zothanmawia, Pharm.D. (PB) Drug Information Centre, RIPANS