Smuggling leh Mizoram
Mizoram hi India ram state hmasawn lo leh kilkhawr taka awm a ni a, khawchhak lamah Myanmar nen ramri inṭawmin kan awm a. Hei vang hian ruihhlo leh ralthuama sumdawngte tan thil tawlh rukna kalkawng remchang tak pawh a ni ngei ang.
Hetiang hi kan ram awm dan a nih avangin state dangte ai maha kan fimkhur a ngai a ni. Bangladesh kan hlat lo a, hel tamna ram Manipur pur nen kan in ṭhenawm bawk avangin ruihhlo leh ralthuam tawlh nan kan ram hi a remchang viau pawh a ni thei.
MNF ministry lai phei kha chuan Aizawl khawpuiah ngei pawh hel leh ralthuam an tlangnel thu kan hre fo a. Hel leh ralthuam tawlh rukna hmun ni thei awma ngaih theih turin Aizawl khawpui chhungah ngei pawh a khat tawkin silai leh grenade man a ni ṭhin a, khang ralthuamte kha hel hnena hralh tur nia sawi te pawh a awm ṭhin a nih kha.
A khat tawka thil thleng deuh reng chu Silchar lam aṭanga lo kal leh Zokhawthar lam service Maxicab-ah te hian ruihhlo man a ni fo a. A neitu hriat loh tam tak a awm laiin neitu neite chu a neitute man nghal an ni ṭhin a, thubuai te pawh an awrh fo reng a ni.
Kan buaina lian ber leh thil pawi tak chu smuggling kaihhnawih thil tam takah a mawhphurtu chhui chhuah leha ngawih bo san tak kan ngah ta lutuk hi a ni. Tualthahna rapthlak pui pui pawh a awm ve ta fo a, mahse India rama police ṭha ber nia kan sawi ṭhinten Mizoram zim tea sualna lian pui pui an chhui chhuak thei lo ta fo mai hian nakinah pawi lian zawk khawihna kawng a hawng mek a ni.
Tun hnai deuh maiah pawh Aizawl khaw daiah Rangkachak suam thubuai lian a awm a, engemaw chen chu chhui a ni ve a, tunah chuan a thawm a reh leh ta deuh mai a ni. Hetiang thil hi a awm ta fo mai. Mipui beisei phak lo lutuka kan police-te an chet ṭhin chhan nia lang chu kan politician-te leh mi challangte an inrawlh ṭhin vang a nih hmel a, hetianga mi dik lo te an tal put fo theih chhan lian ber erawh sorkar a ni thung ang.
Corruption pawh kan hu avangin kan do a, mahse thil sual te thama kan police-ten hna an thawh ṭhat ngaihtuahin thil sual lian tham chhui kawngah erawh an hnufual leh viau lawi a. Police te tana chhui chhuah loh theih loh tura ngaih thil tam tak hi chhui chhuak loin kan pamṭul san tawh a ni. Hetiang hian hun rei tak kan kal ta a, tuna Mizoram hmabak chu ruihhlo leh smuggling zalenna ram, hel zalenna hmun a ni mai ang tih a hlauhawm ta viau.
Sorkar hian corruption pawh a zung chawpa phoro a tum a ni a, hetiang chiah hian smuggling kaihhnawih thilah pawh hian tun ai hian tihtak zeta ṭan la in ngawrh zawkin misualte hi chhui ṭhin ni se chuan tuna kan beidawn sak tam tak hi chu kan chhui chhuak ngeiin a rinawm.
- Ramhmangaiha