Hunpui leh punkhawmna tênau

Mizorama Covid-19 hripui lêng zet chuan Aizawl khawpui mai bakah, district khawpui dangte leh thingtlang khaw tê deuh zawkte pawh a luh chhuah ta zel mai a. A manganthlak ngawt mai.

He hripui chim­awm tak hi 'a darh zau zel loh nan' tiin, biak-ina inkhawm pawh thla 8 chuang kan nei thei lo ta hial a. Kan nghahhlelh em em Krismas meuh pawh kohhrante'n kan hman theih loh hial a rinawm ta. 

Sawrkar pawhin Krismas leh kumthar hun­puiah mipui pun­khawmna lam chi rêng rêng buatsaih lo turin kohhrante ngen a tum niin a lang. Krismas kan lawm ṭhin dan te, Mizo Kristiante'n kan ngaih pawimawh dan te, kan thinlunga a lenziate ngaihtuahin, a lungchhiatthlak tak zet a ni.

Krismas awm chhan chu Krista a ni a, Kristiante tâ a ni. Kohhran lú - Isua Krista pian cham­pha lawmna leh a puala inkhawm leh a kaihhawih thil hrang hrangte pawh koh­hranin a buaipui leh a kenkawh a ni ber. 

Kristianna nena inzawm hauh lo leh kohhran huaihawt ni miah loa Krismas vuakvêta a phawvuaka kan chêt velna dang - mimal, ṭhian dun, ṭhian ho, chhungkua leh páwl dang anga kan tihte hi chu a pènhleh deuh tawh a, tam tak phei a phawvuak mai a ni. Krismas kan hman chhan - Isua Krista nena inkungkaih pawh a ni chiah lo ṭhin.

Hripui laka himna atan leh hri a darh zau zual zel lohna atan, tia sawrkarin kohhrante Krismas leh kumthar hmang lo tura ngen a tum rual hian, punkhawmna tênau deuh zawk chungchangah pawh sawrkar leh mi tin kan fimkhur a ṭha àwm e.

Kohhranah Kris­mas leh kumthar kan hman loh avang leh a lawmna ruai pawh ṭheh a nih dawn loh chhuanlama chhung­kua leh ṭhian hoa inṭuk khawma thil tihho tum an tam viau mai thei a. Chu'ngahte hlei hlei chuan fim­khur tlàn a va ngai dawn em. 

Hetiangah hian kan fimkhur lo deuh nge nge a, hripui inkai darhna remchang tak a ni thei. Heng chung changah pawh hian sawrkarin ruahmanna leh inkaihhruaina fel tak a neih i beisei phawt mai teh ang.