CYMA hi Myanmar Kuhva tawlh dotu nge a nih thlawptu?

Kumin kum tir lam deuh khan Central YMA chuan Myanmar aṭanga kuhva rah lakluh a do thu a puang a, CYMA president khan, YMA chu kuhva ro chungchangah a dinna ngaiah a la ding reng tih te a sawi a. CYMA-in tih dan tur a rèl fel hma chuan Myanmar aṭanga kuhva ro tawlh tawh lo turin mipui a chah tih te kha a puang ta niin ka hria.

Hetiang a nih lai hian kar hmasa lawk khan CYMA bawk hian Dan lova kuhva rah Myanmar aṭanga lak luh ṭhin chu awlsam zawka lakluh a nih theih nan an ti ni awm takin thu an rawn chhuah leh a. Chutah chuan Myanmar aṭanga kuva lakluh aṭanga chhiah (tax) lak ṭhin 40% chu a tam lutuk nia sawiin 20 % chauh la tawh turin sorkarah rawtna an thlen leh lawi si a ni.

Hetianga sorkarin tax a lak ṭhin 40% atanga a chanve lai mai tihniam tura an rawt leh hnuhnawh hi kei MA fail hian ka hrethiam lem lo viau mai.

Mizorama kuhva chingtute thlavang hauha na taka ke pen tur nia ka ngaih CYMA hian dawih aw an chhuah leh ta nia lang thei a, kuhva lakluh aṭanga tax tihhniam an han rawt ta thut mai hian min barakhaih viau a ni. Ka hriatthiam loh chu thuhran, Mizorama kuhva chingtute mangan zia hria a, mawi kawha ṭang tura ka ngaih CYMA meuhin hetianga thu an nei da tlat hi ka bangbo viau a ni.

CYMA hian kum­in kum tir lam pawh khan Bairabi a kuhva rah ro dah khawm­na hmun bamboo industry kudam pakhat pawh an lo tlawh tawh nghe nghe a; Zam­puimanga Group YMA hruaitute'n lo dawngsawngin, Bai­rabi South Branch YMA Office-ah kuhva rah chungchanga hmalak zui zel dan tur an sawiho hial kha a ni a.

Khang te kha hmanni lawk thil thleng mai a ni si a, ka bangbo tulh tulh mai.

CYMA hian Mizo­ram hmun hrang hranga kuhva rah ro dah khawmna kudam an tlawh bawk khan ka hria a, mi chi hrang hrang an kâwm kual bawk tih an sawi nghe nghe a ni. Khatiang khawpa zirchiang si chuan Mizo kuhva chingtute a nghawng nat dan te pawh an hre chiang ber turah ka ngai a, Mizo mipuite thlavang hauh a ṭulzia pawh mitin an hmu chiang turah ka ngai a ni.

Bairabi kudama kuhva rah dah khawm sa pawh an phurh chhuah khan engmah thawm a awm zui awm ka hre lo a, a neitute thu han zawh fiah emaw pawh a awm awm ka hre lo nghe nghe a ni. Kha kuhva rah kaihhnawiha document awmte chu a lem vek a nih thu CYMA hruaitute an lo hrilh tih te kha an la sawi ta deuh deuh a, khatiang khawpa thil dik lo nia lang pawh kan dodal lo a nih chuan CYMA hi Mizo mipuite hian kan ring ngam tawh dawn em ni aw?

- Pekhlua pa