Parking fee khawn ve ringawt
Tun hnaia ka thil tawn pahnih chu Parking Fee khawnna tur nia ka ngaih loh hmun hnihah parking fee min khawn. Pakhat zawk chu Aizawl SP Office bulah a ni a, pakhat chu Rajiv Gandhi Stadium pannaah a ni.
Aizawl SP Office kianga mi hi chu ka hrethiam a, mipui vantlang kawngpui a ni lova, anmahni compound chhung liau liau a ni. A chhunga lirthei kan dah duh a nih chuan parking fee an tuk ang hi chu kan pek ve mai a ngai. Hotel Ritz bula in hnuaia motor park theihnaah pawh sawn bike hi ka hung ve zauh zauh a, ni a sa lo bawk a, a him ṭha a, a tihchi phian mai.
I League inkhel en turin kan kal a, petrol manah kan inseng tawh a, ticket kan han lei leh a, kan insenna a nasat tawh vei nen, RG Stadium panna kawng chhoa parking fee khawn hi ka hrethiam lo. Hei hi Aizawl Municipal Corporation-in Parking Fee khawnna tur hmun a tih zingah a tel lo.
Vantlang kawngpui dunga lirthei park-ah a fee khawn theitu an awm thar ta em ni? Hei hi thuneitu lamin an enfiah a ngai a, chuti lo zawng dik lo taka football fans hnen aṭanga pawisa laksak ang hialin a lang a ni. RG Stadium compound chhung bikah saw chuan thuneitu lamin fee hi lo lak tir ni se a dik zan mai, a pawna a panna kawngpui dunga lirthei daha parking fee khawn hi dan bawhchhiatna a niin ka hria.
Dan bawhchhiatna a awm hian bawhzui a, chin fel nghal vat a nih loh chuan midang a kang kai nghal thuai ṭhin a, a lo rei hnu chuan Mizo mipuite tana harsatna lian zawk thlentu a ni ta ṭhin a ni. Mipuiin
ṭul lo takin harsatna an tawk a nih chuan a mawhphurtu chu sorkar a ni a, chuvangin mipui hian an dikna chanvo hi dan ang thlapa an chan a ngai a, chutianga ti theitu chu Aizawl khawpuia thuneitu AMC hi a ni e.
Heti hian ngaihtuah ta ila, Hawla Indoor Stadium-ah basketball inkhel a awm hian Republic Vengthlang aṭanga ITI Veng pannaah hian a tawn tawnin lirthei an hung khup ṭhin a, hetah hian parking fee lo khawn ve ta mai se a dik lo ang, vantlang kawngpui parking fee khawnna area pawn lam a nih vangin.
Vaivakawn Field-ah hian inkhel a awm ṭhin a, mipui an tam changin Kanan kawngpui phei leh KM HSS bulah hian lirthei an hung ṭhin a, parking fee khawn chi a ni dawn em ni? Chutiang zelin Ramhlun Sports Complex bul kawngpui velah pawh hian lirthei an dah ṭhin a, tumahin parking fee an khawn ngai lo. Thuneitu lam hian an enfiah a ngai a ni.
- JamesVanlalliana Hnamte, Bethlehem Vengthlang