Zofate'n Kan Soft Power Hman Thiam A Hun

'Global Order' a inthlak chho mup mup a, US leh China ten 'Super Power' nih inchuhin leh Regional power rawn ṭhang chho mekte chuan Multipolar World-ah khawvel an hlang kai mek a. India ram pawhin chu inelnaa tel ve chu duhin a power neih ṭhat ber “Soft power” hmanga khawvel awp ve tumin, Modi pawhin Bollywood, yoga leh heritage kan neih, architecture, cuisine leh democratic values te a hma theh a. 

Joseph Nye-a'n Soft Power­ a rawn sawi chhuah (Concep­tualise) hmasak ber ṭum aṭang khan Soft Power hian mi mit leh beng a verh nghal chat a. US pawhin chumi hria chuan an 'Power' chu military leh economy mai ni lovin, an culture (Hollywood etc.) te hmangin khawvel a run ta a ni.  

Hnam tinte hian mi dang culture kan inzir tawn vek tawh a. Culture lian zawk mai ni lo, mahni aia culture tê zawk entawnna 'Cultural appropriation' te hlei hlei hi a nasa tawh zawk emaw ni a tih theih ang. Hei vang hian Diplomat fate (Third Culture Kids) ngat phei chuan culture han adopt mai turah buaiin, 'identity crisis' an neih nasat phah hle. Eng culture mah hi chungnung bik a awm lo tiin 'Cultural Relativism' a ṭhang nasa telh telh a, 'Ethnocentrism' paih thlak a ni zel bawk. Hei tak hi keini Zofate pawhin kan hman ṭangkai tur, tun ṭuma ka rawn sawi tum tak chu a ni.

Hnam naupangte ni chungin kawng engkimah Mizote hi hmasawnna duh mi, hnam chapo leh induh larh mai kan ni hlawm a. Kan tel ve tawhna re reah chuan 'a ber' nih kan tum tlat ṭhin. Kan ngaihsak zawng footbal ni se; India ram Footballer ṭha nei tam ber state kan ni a, Mizote chu Footballer thiam tak tiin min hre tawp a, 'Mizoram' hi an lam ri ve ta fo a ni. Kan talent te pawh inang lo tak tak kan ni ta ve ang. Chuvangin kan eizawnna pawh kan hawi zau (diversify) thiam zel hi a pawimawh khawp mai. 

Lehkhathiam tamna (lehkhazir ni lovin) state kan ni lova, hnam dang (vai) te chu khawvel zirna ]ha ber 'Ivy league school' rap pha pawh an kat nuk tawh. Tin, kan ṭhalaite hi IAS an ni vek dawn lova, an tui vek kher lo bawk. Tin, IAS tamna state BIMARU states te khu tuna India rama state hnufual ber an la ni tho. Chuvangin Officer neih tam ringawt hi hmasawnna ber a ni lo. State hausa ber Maharastra te khuan an culture (Bollywood) hmangin India ram awpin, khawvel a deng chhuak thei a nia.

Chuvangin, 'Performance Arts' (Dance etc) ah K-Pop Culture influence-na hnuaiah a ṭhen an kal a, lawmman pakhatna hialte pawh an lak ve ṭhin kha. Potential nei ṭha tak tak ṭhalai kan ngah chho zel a. Hengte hmang hian Mizote hian khawvel tukverh kan dak chhuak mek a, “MIZO” tih hming pawh an lam ri ve ta fo mai. 'Korean wave of culture' hi anni Korean-te chuan Soft power-ah hmangin an diplomacy pawimawh tak a ni tih I hrethiam em? Mahse 'beauty culture' an kalpui dan leh mipa pawh hmeichhia ang maia 'Androgynous fashion' an hman dan erawh kan thliar thiam a ṭul ang.

Khawvel hi ṭhalaite ta an tih ṭhin hi a dik ngai a nih chuan tuna 'Generation Z' (1995 to 2010 a piang) te hi a neitu ber in ni mek a. Technology mai ni lo, Digital world-ah kan cheng tawh a ni. Engkim inbiakpawhna (medium) atan Social media kan hmang vek tawh a. Moore's Law leh  Law of Accelerating Returns sawi angin khawvel hi a awlsam tawlh tawlh a. Mahni ngaihdan pawh huai takin (Cognitive liberty) kan nei tawh a ni. He medium hmang hian nasa takin kan culture hi kan promote thei a, chutihrualin duh duh sawi ve tawp mai 'Gonzo/Yellow Journalist' kan pung mek bawk.  

Hnam dangte hi lehkha leh ṭawng lamah chuan engtikah mah kan tluk dawn lo. Mahse kawng erawh a awm a ni. Modelling lamte hi! Kan model neihte hi an zahpuiawm tawh bik reng reng lo, hengte hi eizawnna ti-diversify-tu pakhat a ni thei. Chutihrualin, an hnathawhna hmuna advantage-a lo inlak tum ang chi te inven nan 'Sexual Harassment at Workplace' Dan kan neihte pawh hre tel bawk se la. Heng Photography lamte hi tuipuia luhchilh tak tak chuan a hlawkin professional line-ah chuan hna zahawm tak a tling.

North-East-ho zinga min dah chungnunziate hi mak ka ti ṭhin. Kan zaithiam chhuak hmasa famta, Michael M Sailo te, Magdalene te, 'The Stage' meuh a top-a lang thei Crystal Malsawmi Renthlei etc. te avang ringawt pawha Mizo nih nawmzia hi I hriat ve tawh ṭhin ka ring. Shillong Chamber Choir te pawh khawvelin a hre tawh a ni a, kan 'Mizo Cardinal Choir' ang chi te hi promote deuh deuh an phu a ni. Mizote hi kan music taste a sangin 'poetic device' kan nei ṭha em em bawk a, kan aw (voice) a chak ṭha in, zai lamah potential kan nei ṭha hle. Lehkha zir sang lem lo tan pawh Hotel leh Restaurant-ah Mizote chuan zaina an hmu zung zung ṭhin.

Chuvangin hei hi Pathian malsawmna a nih hriaa in-discourage-sak mai lovin, Mizote an 'fashionista' min tih pawh hi a dik a ni. Thawmhnaw dawrah kal ila, Mizote en ang chu nalh riaua hriatna an nei tlat a nia. Chutihrualin incheia thawmhnaw 'branded' inbel theih ringawtte hi changkanna a ni lova, 'materialism' daih a ni tih pawh hriat tel a ṭha. Consumerist culture hian kan ṭhalaite rilru a ei ngêt mek a. Nu leh pa te thawhchhuah sa eia awmawl ngaina (Hedonist) rilru pu kan tam em em bawk. Chu achhapah a chhiar tlem tlem hi inla fing (liberal elite) kan kat nuk tawh bawk. 

Kan hmeichhiate aia ṭawng thei 'Male Chauvanist/Phallocentrist' deuhho hian kan hmeichhiate inchei dan hi kan er nge ni, kan khing tawk viau zel erawh sim a hun khawp mai. 

Evangelical society kan nih hre reng chung a, tunlai mila Pathian thu kalpuitu ni lovin Pathian thu mila tunlai mite hi kan kal a, eng eizawnnaah pawh kal ila, Chinese pa sap rama lehkhazir ang deuha 'Brain Drain' hlau ranin, “MIZO” tih hmingṭhat tum rilru pu a, hnam tan ka thawk a ni tih hre chungin, Zoram khawvar hun hi engtikah tak thlentir ang che maw?