MHIP hi khawiah nge in awm?

Hman deuh khan nula pakhat chuan a rukin, mi hmuh tur pawh ni lovin thla a la a, a leak out palh a, "kan venga awm tlak a ni lo ve" tiin kan hnawt chhuak em ni kha? Hmeichhiaten a thlavang hauh chu sawi loh, kan diriam hle zawk em ni kha? Tunah erawh a ruk pawh ni lo, langsar takin social media lamah leh naupangho hmuh theih turah Local Chanel lamah kumkar zawng zawng langin kan inpholang a, kan inphelh ta chiam chiam a. Hmeichhe zahawmna humtu pawlte hi khawiah nge in awm leh tak si?

Miss Mizoram 2017 chungchangah hian Organising Committee te hian eng rilru puin nge kan tih ang aw tih zawhna lian tak a awm. Kan nulate mi puitlinga chher chhuah kan tumna hi organising committee lamte an fakawm thlawt a. Kan hnam nunzia leh sakhuana sadai chhuih hawng rawk tura huaisen tir a, luipui kama thlang sappuiho nunzia anga kan farnu, an chawn a lang ang tih hlaua kan khuh ṭhat ṭhinte kan inphelhtir ve ngawt erawh kan ti lu deuh em aw a tih theih.

Hei hian hrin chhuah a nei ang em? Engnge a lehpekah a nghawng ang? Saruak deuh thawa inphelh hi ṭhangthar zawkten changkannaah kan ngai ang tih a hlauhawm ta em? Khawvel changkang zelah mite tih theih ang apiang ti thei tura kawng hrang hranga hma kan sawn hi a lawmawm a, hma pawh kan sawn nasa a, hmasawnna kawng dik a awm rualin hmasawnna zawng zawng hi thil ṭha a ni vek ang em tih erawh ngaihtuah fo a duhawm hle.

Modelling lamah pawh nasa takin hma kan sawn a, hei hi thil lawmawm tak a nih a rinawm. Chutihrualin sakhaw mumal nei lote tih dan ang te, Paris leh London vela an tihdan apiang tih ve theih zel hi changkanna a ni ber em? Kan hnam nunzia uluk taka ngaihtuah chunga thlitfim chin awma hmasawnna kawng kan zawh tel a ṭha lawm ni? nge a ken tel ve alawm tiin "tunlai khawvel tihdan alawm" kan ti zel dawn?

“Modelling hi art alawm” tia art lipuia pawl khat pawh inchiah hauh lote hian 'art' hi lo tawngpawng âtpui chiam tur pawh a ni lo vang. Tin, TV lama pek chhuah hun hi ngaihtuah chian a ngai bawk em? Khawvel show lar leh Fashion TV te pawhin zan reiah asin ruak keng kungte chu an pek ni! Keini erawh thlitfim (censor) awm lem lovin kan chhuah leh ang lawi a nih hmel a! Kum tling loten an thlir dauh dauh a nia!

Heng kan nulate hi naktuka kohhran leh ṭhalai inkhawm ṭantu-ah te, thupui hawngtuah te kan la hmang dawn. Biakin chhungah kan lawiza ang a, Kelkangah te pawh kan kalho leh maithei asin! Top 10 a ni emaw, pakhatna a ni emaw dinchhuahpui tham khawp eizawnna a tling tawh reng em? Henga inphelh te hi an hmalam hunah an eizawnna kan pe thei dawn em?

Mahni chanvo leh zahawmna (dignity) humhimna chang hre lo leka hetianga hmeichhia kan tithangtlâwm ṭhin hi a huatthlala em? Hetia zahmawh thla lang kelh kulh reng chunga ‘bikini round’ tia han inbawl phawn vel hi eng nge maw a hlawkna tur le? A lehpekah Blue film chan (porn star) hi kan hlat ta lo em?

Lansarhna man tlawm (cheap popu­larity) ni tur leh mahni zahawmna zawng zawng hlip tur hian Mizo mipa te hian kan farnute hi hming ṭhat aiin sum tam lo takin kan hralh ang maw? “Vawiina ṭantu kha a serh leh a hnute tih loh chu Mizoram pumin kan hmu tawh asin” tiin kan farnute hi ti ta se kan lungawi meuh ang maw?

Hei hi Mizoram a ni a, kan la cheng zel dawn a nih si chuan kan hnam nunzia (culture) pel rawka saruaka chang­kanna kalpui tum hi kan zo meuh ang maw? Kohhran, khawtlang ngaihtuah ila; vawiina mite hian pasal te neiin fate an la nei dawn. Mizo chhungkua leh khawtlangah nun chep ru tak, mi mirin endan nei sa (stigma) hian kan farnu te hi hrehawm takin kan siam zawk ang em tih hi ngaihtuah zui vang vang tur a awm em? kan zonun ze mawi hi a ral riai riai nge kan inher rem ni ta zawk? nge kan ngaihmawh hi a hovin kan ṭhing bik ni ta ang le?

- Zonunsanga