NIAS CHUNGCHANG

Nalanda Institute of Advance Studies (NIAS) chungchang hian Zoram khawvel a chiah hneh hle a, Minister Pu Lalrin­mawia leh MYC Chairman Pu T.Sang­kunga ten an ban phah hial a ni.

Nalanda Institute of Advance Studies chungchangah hian mahni ṭanghma ngaihtuah a, chak taka hmalatu an awm tih chu a hriat theih a, hma nasa taka a lo lak avang leh, sum leh pai pawh a kalkawng dik taka zawh lovin, phalna te la hmasa lova, pek tlak vek tawh hnuah, sum pek phalna lak chauh a nih avang khan, a changtu Minister leh MYC Chairman pawh a tiphu chiang hle niin a lang.

Sawrkar Officer-in MBOCWWB pawisa tling khawm kha a lo hmang mai a, he sum hi sawrkar sum hman dawna Planning Department te, Fi­nance Department te kaltlanga buaipui ngai lem lo a lo ni bawk si a, chuvangin tu emaw bengvarin, a lo hmang ta ni berin a lang.

NIAS chungchanga buaina a lo rik chhuah tirh khan, kan Chief Minister pawh a ṭang kawh nasa a, a sawrkar lai policy-ah pawh ṭhalaite hamṭhatna tur ngaihtuah a hmalak te a tel avangin, a Minister leh Chairman te chu a chhan a ni. Hotu a ni a, a tih tur pawh a ni, dem tur a awm lo.

Tin, Officer lamten an thu fah a lo dik tawk lo bawk si nen.

Nimahsela, thu dik hailan chhoh zel a lo ni a, thu dik tawk lo fah a lo ni tih te hriat chhuah a nih khan khawvel mifing leh hruaitu ropuite ang bawkin, a lo dik lo a ni tih a sawi leh mai ngam te kha a ropui a, fak tlak a ni. Minister leh MYC Chairman ka ban dawn lo a tih pawh, a ṭul chuan a thu a sut a, an banna a pawm leh mai. Hetiang hi hruaitu ropui zia a ni.

Kolkata Mizo Student (KMS) ten NIAS zirchianna an neih report Vanglaini Dt 22.02.17 phek hnihnaah khan, NIAS hi zirna in lem chu a ni lo a, affiliation pawh Annamalai University hnuaiah neih a ni. Class te pawh kalin, exam te pawh conduct ṭhin a ni a, pawl pawh an sawn ve a ni tih a hriat theih. Amaherawhchu, zirna in nuam leh pui tak a ni lo tih chu a hriat theih.

An enkawlna hnuaia thil dik lo in­phum a awm avangin, LEIT Minister leh MYC Chairman te chuan gentlemen takin, chhui a awlsam zawk nan an nihna aṭangin banna an theh lut a. Chief Minister pawn chhui chiangtu tur ruat turin Chief Secretary a hrilh a ni.

Hetianga kan sawrkar chelhtuten hma an lak dan hi a puitlingin a fak tlak takzet a ni. An chungah rinna nghatin i lo thlir zel ang u.

- V.Lalsawmliana, Aizawl South