MLA bo zawnna

Kum 2023 ah hian Mizoram chuan roreltu a thlang leh dawn tawh a, tun hnaiah party lam pawh an ṭang tawh khawp mai.

Party hrang hrang hian inenletna tur an nei ang tih ring chungin ruling hi chu langsar ber an nih avang hian beih hlawh ber pawh an ni ṭhin a, MLA bo an tih te kha khaw nge an lo awm tih zawhna hmangin titi i han vawrh dawn teh ang hmiang. Hun dangah kan lo ngaihtuah ngai zen zen pawh a ni lo maithei a, mahse mipui tana thil pawimawh tak a nih ve si avangin chhui let a ngai tlat mai.

Mizoram sorkar tih fuh loh ve tak mai chu, Lunglei khawpuia RT-PCR khawl an bun duh tlat lo kha a ni. Kha khawl kha Congress MLA pek pawh ni raw sek sek han bun hmiah mai se thu a tawp zui nghal a, 2023 inthlan a nghawng phak miah lovang tih hi a sawi ngam a ni.

Mahse kan sorkar khan RT-PCR khawl kha an bun duh ta tlat lova, Lunglei mipui leh Lunglei District aṭanga chhim lam Lawngtlai leh Siaha District chhunga chengte chhawr ve phak tur khawl ai chuan party an dah pawimawh tih kha kan la hria ang chu maw?

Khawl bun mai mai tur chung changah khan High Court hial luh a ṭul ta a, Lunglei mipuiin duh taka an aiawha an thlan MLA te chuan 'ṭik' pawh ti ngam lovin an mipuite an chhan lo reng reng a ni.

Lungleiah trueNat khawl dang an dah belh ang tluk tluk a, a Mizoram ruling party tehreng pawh khan 2023 ah inthlan a awm dawn tih an hre lo nge ni an vote an va dil leh tur mipui kha an ngaihtuah thleng tawh si lova, Lunglei ṭhalai leh mipuite chuan khatih hun laia MLA ngawi reng kha chu an theih­nghilh thei kher tawh lovang.

Champhai lamah pawh MLA ngawi reng leh MLA bo kha an awm ve leh tho a ni. Kuhva smuggling thu inchuh a awm lai khan Champhai District lama MLA te khan mipui lama ṭang khan eng­emaw tal kha lo sawi chhuak ve zauh ngam se a ṭhat nen mipui lama ṭan aiin party lama ṭan an thlang ta tlat mai a nih kha. Khatianga an tih khan rilru nuama an awm theih tawh hi ka ring lo a, mahse an ti duh tho chu a ni sia.

Kum 2023 ah vote an la dil leh dawn avangin lo in hma­khua nachang hria se anmahni tan ber hian a ṭha tur a nia.

- Lalrinawma (Marina)