Zuk leh hmuam i bansan ang u
Vaihlo zuk leh hmuam kan taksa tichhetu leh thihna thlentu hi i han bel chiang teh ang. Kan khawtlangin sualah pawh an ngaih lem loh zuk leh hmuam hian zofate nunah thu a sawi ril hle a, chin dan ṭhanah kan lo nei ta zel ni pawhin a lang. Chutih rual erawh chuan mi kan lo changkang chho zel a, vaihloin kan hriselna a tih chhiat nasatzia leh thihna thlentu a nih dan te kan sawi chamchi ta mai.
Ṭhenkhatin nghei kan duh laiin ṭhenkhat erawhin tui ti takin kan la zu in kan la hmuam mek zel a. He ti zawng hian i han ngaihtuah teh ang, Genesis 1:27 ‘Tichuan Pathianin ama anpuiin mihring a siam a’ tih ziak kan hmuh angin Pathianin mihringte hi a duh taka Ama anpuia a siam kan ni.
Kristian rama cheng leh ringtu tan chuan he thu hi kan ngaihtuah ngun a ngai hle mai. Pathianin a duh taka a siam he lei taksa hi kei nin kan nawm kan maka kan duh dana kan tih bawlhlawha kan tih hmelhem hian Siamtu thinlung a ti na ngei ang le.
Mitin te hi Pathian mithmuhah chuan kan hlu in kan mawi em em vek a, kan taksa hi Pathianin min siam chhan ang ngeia Amah chawimawi nan leh A ropuizia tilangtu a nih theih nan uluk taka vawng thianghlim tur kan ni tih hi kan hriat thar leh a pawimawh. Zuk leh hmuam ti ṭhin chuan a taksa tichhiain nasa takin vaihlo tur hmangin a nghaisa a ni, mi pangai tak ni ṭhin kha ramtuileiloah a siam a, thihna hial a thlen ṭhin a ni.
Vaihlo zuk leh hmuam chuan i hriat loh hlanin i taksa chu a lo thunun thui hle tawh a, i hriselna pawh a tichhe mek a ni tih hriain bansan i tum tawh ṭhin em? Nghei thei loa inngai in i beidawng ṭhin em?
Chutiang dinhmunah i ding mek a nih chuan vaihlo zuk leh hmuam hi kum tam tak lo hmang tawh mahla a nghei theih a ni. Nghei tumin nasa takin i bei tawh pawh a ni thei a nghei hlen theih a ni tih hria la. Sam 8:5 ah chuan “Ani chu Pathian aia hnuai deuh chauhvin i siam a, ropuina leh chawimawina i khum tir si a. I kut chhuak chungahte hian thu i neih tir a; a ke hnuaiahte engkim i dah a” tih ziak kan hmuh angin engkim chunga thuneihna leh rap bet thei khawpa chungnung leh ropuiin Pathianin mihringte hi min siam a, chu thiltihtheihna hmang vek chuan vawiin thlenga nangmah sal bettu che, tur hlauhawm vaihlo zuk leh hmuam hi i do hneh thei a ni tih hre thar chungin hma han la teh le.
Engkim chunga thuneitu kan mamawh leh dilna ngaithla ṭhintu hnen chu pan a, A tan in serh thianghlima a ropuizia leh thiltihtheihzia tilangtu zinga i tel ve ngei theihna turin vaihlo zuk leh hmuam bansan turin hma la rawh le.
- Rebecca Lalruatfeli Hnamte Psychologist National Tobacco Control Programme