Hindi zirtirtute leh an thil nawr hi

Central sorkarin India ram puma Hindi ṭawng thiam turin beihpui a thlak a, chumi kal zelah central sponsored scheme hnuaiah state tinah Hindi zirtir a enkawl a, Mizoramah pawh Hindi zirtirtu 1305 lai lak an ni.

Heng kan Hindi zirtirtute hian kum tin bond an ziak a, central-in a tihtawp hun huna thlawn mai thei turin an intiam vek a ni.

Hun engemaw chen central sorkar chuan heng Hindi zirtirtute hlawh hi state sorkarah a rawn pe ta lo a, thla 10 lai hlawh la loin an awm ta mek a ni. Thla khat hlawh lak loh pawn kan buai a ni a, thla 10 lai hlawh an lak loh chuan an harsat dan tur chu namai lo tak a ni.

He harsatna hi Mizoram mai ni lo, state tinin an buai phah em em a, central sorkar pawh an nawr reng a. Mizoram sor­kar pawhin theihtawp a chhuah a, chief minister mai ni lo, governor pawhin central-ah a thlen a, kil dang aṭang pawh central dawrin education minister leh parliamentary secretary te pawn an nawr tawh bawk a ni.

Hetihlai hian Hindi zirtirtute chuan Mizoram sorkar chu na takin an nawr a, Chief Minister office tuala ṭawng­ṭai rual an nei a, hemi ṭum hian CM te nen pawh an inber nghe nghe a ni. Chu chuan awmzia a nei thui lo nge, a tukah kawng an zawh a, a tuk lehah CM gate bulah zan rei tak thleng an ṭhukhawm leh a.

Hemi ni hi CM buai em em ni a ni lehnghal a, chuti chung chuan an aurual dual dual a, hel awmkhawm an ang ka tih hle. A tuk Zirtawpni zingah CM chu an hmu leh a, theihtawp an chhuah reng thu CM-in a hrilh a, hemi ni hi chuan an punkhawmna Vanapa hall kawtah pawh an awm rei ta lo a ni.

Inrinni aṭang khan CM office gate bulah an pungkhawm leh a, an tlaivar zak nghe nghe a. Pathian­ni-ah pawh an chhun­zawm ta zel a ni. Lehlam takah chuan eptu party-ten an fuih­pawrh ru ve reng ang tih a rin theih awm e. Sorkar mual­pho chu eptu party tan chuan an tih tur pakhat ve reng a ni bawk a.

Engpawh nise Hindi zirtirtute harsat­na chu chief minister leh sorkar hotu liante pawhin an hriatpui a, mahse an hlawh rawn thawntu central sorkarin a rawn pek miau si loh chuan tih vak ngaihna a vang khawp. Central-in an hlawh a rawn pek tak lohah chuan engtikah nge an rawn pek ang a, sorkarin engtin nge a chhawr zawm ang tih chu zawhna a ni.

Anmahni 1305 laite chuan sorkarah dah ngheh an phut na ropui mai si a, sorkar tan chuan a luhai thlak ve ngawt ang. Sorkar department hrang hrangin an mamawh em em rawih tur post ruak pawh an hnawh khah theih loh laia Hindi zirtirtu tura post han siam leh chu state sum dinhmun aṭang chuan tihngaihna a vang khawp ang le.

- Lalkhirhvela