PWD Magician vs BRTF Magician (1 km = 100 km)

Hringnun tinuamtu leh tihlimtu thil hrang hrang khawvêlah hian a tam hle mai. In mâwi leh fâi tak tak te, thingtlâng khua leh khawpui fâi tak tak te, intihhlimna hmun picnic spot leh resort centre hrang hrang fâi leh uluk taka enkawl te, dâwr, restaurant leh kawtthlêr mâwi tak tak leh thianghlim taka enkawl te; a dang pawh a la tam ang. Min tihlim a, kan rilru hahna leh kan natnate pawh eng emaw chenah chuan min chhâwk zângkhâi hial ṭhin. Hêng thilte bâka min tihlim êm êmtu langsâr tak mai pakhat chu kawng ṭha hi a ni.

State hrang hrangah kan zin a, an kawngpuite a lo ṭhat viau hian phûrna nasa tak min pe a, min tihlim ṭhin. Kawngpui ṭha taka thla han lâkte hi a mâwi duh bîk êm êm a, a romantic hle bawk. Chu kawng mâm leh nuam taka kal rêng rêngte chuan sawi chhuah hleih theih loh hlimna leh phûrna chhungril takah kan nei veng veng ṭhin. Kan ngaihtuahna pawh a tichangkâng. Kawng ṭha hi hringnun tihlimtu leh min tiphûr theitu magic ropui tak a lo ni.

Hringfate hi hmun ngâiah kan awm reng thei lo a, lirtheite hmangin hmun hrang hrangah kan che sawnin kan zin kual ṭhin.

Kum 2016 January thla khân kan ṭhianzahoin Darlawn khuaah car-in kan zin a. Kawng ṭha vak lo tûra kan ngaih lâiin a lo ṭha khawp mai a. East Phaileng leh Darlawn inkâr phei chu an siam dân a dikin tlân a nuam hle a, kan hlimin kan ti ti tûi hle. Kawng ṭhat lehzualna hmunah phei chuan kan ti ti hlei thei lo a: ‘Za lamlian tual phei, aw a thui vawng vawng, thâikâwi biahthu hlan nân chuanin e’ tia Zonet Mizo Idol Top 2 Mathlenga’n thiam taka a sakte kha ngaihthlâk pahin kan zâipui chiam a, kan hlim kher mai. Kawngpui ṭha hi magic ropui tak a lo ni.

Kawng ṭha sawi apiang hian mi dum kawng siamtu BRTF leh PWD te hi rilru-ah hian an lo lang nghâl ṭhin. Hmun hrang hranga BRTF-ho kawng siam dânte hi ka hmu fo tawh a, an uluk ṭhin khawp mai. An engineer-te pawh an thiam deuh bîk emaw ni chu aw tih mai a awl. An kawng siama lirtheia han tlânte hi a nuam bîk a, a tlo bik deuh niin a hriat bawk. Driver leh mi ṭhenkhatte chuan BRTF leh PWD te hi an lo tehkhin leh ṭhin a. BRTF hi an fak zâwk tlângpui leh nghâl. Kei erawh chuan PWD engineer-te hi Engineering College ṭha tak taka zir chhuakte an nih hlawm avângin an thiam zâwk ang ka lo ti ṭhin a, kan inhnial phah fo mai.

Kawng a ṭhat hian chhim leh hmâr, chhak leh thlang kan lo inhlat lêm lo. Kawng ṭha hi magic danglam tak a lo ni. Kawng a chhiat hian kilometer khat te hi kilometer za ang mai hi a lo ni a, kawng a ṭhat erawh chuan kilometer zate hi kilometer khat lek ang a ni leh lawi si. Hetiang magic turu lutuk mai show theite chu PWD leh BRTF engineer-te hi an lo ni. An ngaihsânawm asin aw! Zirlai naupangte pawh drawing han ziahtir ila kawng chhe deuh lem an ziak ngai lo, ṭha deuh deuh lem hlir an ziak ngêi ngêi ṭhin. A tê ber thlengin kawng ṭha hi chu kan ngâisâng a ni.

Thil hrang hrang tiin thingtlâng khuaahte kan zin ṭhin a. Kawng a ṭhat hian zin leh hâwn boruakte hi a nuam asin aw! Entir nân, Vanbawng khuaah i zin ta a, i haw lamah Tuirial aṭangin Bawngkawn vêng thlengin kawngpui hi lo mâm ṭhain lo zâu êm êm ta se, Zâwlkhawpui luh hi nuam i tiin i phûr veng veng ngawt ang. Chu tak chu kawngpui ṭha magic ropuina chu a ni.

Kawng a ṭhat loh erawh chuan zin veivahte hi hrehawm kan ti a, ṭawngṭai kan uar sauh a, kan thla a muang tak tak chuang si lo. Tin, kawng a ṭhat hian tukin zinga Suangpuilawna tomato rah reng kha vawiin chhûnah Aizawl zu thleng thla hman nia! Lamherh khawpa rûlngân chuk, thi ṭep pawh kha kawng ṭha hian rei lo te chhûngin Aizawl Civil Hospital a thlenpui thei a, a nunna a chhanhim thei tlat. Magic turu a va ni êm!

PWD magician-te leh BRTF magician-te hi a thiam zâwk kei chuan ka hre lo a, an thiam ka ti ve ve a, ka duh ber zâwk erawh chu an magic hi turu deuh deuhin Zoram dung leh vângah sorkar sponsor-na hnuaiah han show zêl se tih hi a ni. Kawngpui ṭhain kan nun a nghawng dân hi magic ropui chungchuang a ni si a.

- Miltona, Vaivakawn