PUNJAB CM CHET DAN HI AW...

Thla hnih leka upa Punjab Sawrkar Chief Minister chuan a Health Minister chu thamna a lo lak avangin a bân a, a bân mai chu duhtawk lovin thu­buai siamsakin a mantir.

A Minister duh ngawih ngawih, Health Minister Vijai Singla-an thamna a lo lâk avanga Punjab CM Bhagwant Mann-an second khat pawh inngaihtuah buai lova a bân nghal leh, chu mai chu duhtawk lova a mantir tuma a thusawi hi pentui sena chhinchhiah tlak a va ni em!

"Had I wanted, I could have brushed it under the carpet. But I would have broken the trust of the people who trusted me... I will not tolerate corruption of a single rupee"

"Duh ni ila he thil hi ka puanhnuai thei lutuk. Mahse, chutianga ka tih chuan ka chunga rinna nghattu mipuite min rinna a tikeh chhe vek dawn tih ka hria... eirukna hi cheng khat pawh nise ka ngaizam mai mai dawn lo."Hetiang hi a ni kei Politician tak tak ka tih ve chu.

Inthlan laia mipui hnena kutdawh a, rorelna ṭhut­thleng aṭanga mipui hawisan leh si politician hi India ram hian a hring hnem tawh, chu chuan mipui pawh min ti beidawng zo tawh. Chutiang kara hetiang mi dik, rorelna dik kalpui ngam an lo chhuak leh ṭhin hian thla a timuang teh e.

He Punjab CM hian Isua zirtirna thute hi a chhiar melh melh ka ring lem lo. Mahse he a thusawi hian Lal Isua thusawi, "In thu sawi chu, 'A ni, a ni,' 'Ni lo, ni lo' ni ngawt rawh se; chung aia chuang aliam chu sual laka chhuak a ni" (Matt 5.37) tih hi zuk hnaih ber tlata mawle!

A ropui lai tak chu mipuiin an lakah rinna nghat­in an sawrkar tir a, mipuiin an laka rinna an nghah tihchhiat ai chuan a Minister duhlai tak pawh a mantir hmiah mai ngam lai hi a ni. Kristian pachal tam tak hian an ti ngam ve ang em le? Hetiang hi a ni mi faten corruption a zung nena phoro an tih chu. A Minister duhlai tak hrem tur hian huaisen hi a ngai hian ka'n ring khawp a, mahse mipuiin an laka an rinna an hloh ai chuan, lalṭhuthlenga ṭhuttirtu mipui palzut ai chuan tiin huaisen taka a han che rap mai hi ngaihtuah chian poh leh a fakawm.

Chawlhni tina inkhawm, puipunna leh tihkhawm apianga hunserha bul ṭana titawp ṭhin, Pathian thudik huaisen taka vantlang hmaa aupui a, thawhṭan tuk aṭanga thluaka sum lutin a tihbuai tlat ni si nih ai chuan Bible thu hre tam lem lo pawha Bible thu anga nung mai ngamte hi midang tan malsawmna an lo ni thei zawk fe dawn a nih hi a.

Kristian pachal sawi awm tak leh tih awm tak hi kan kawmthlang Sikh pachalte hian an sawiin an ti leh khauh ṭhin zawng a nih hi!

- Rev PC Nghaklianmawia