Kristian Hla bu lamah khan "sang tam tak bona ram a ni" tih kha kan sa ṭhin a, tuna Mizoram hi chu nuai tam tak mai pawh ni lova nuai 100 bona, chhui zui lohna ram, hrem awm lohna ram a nih avang hian kan au kan au loh chuan nuai 100 pawh engahmah ngai lo hnam kan ni tihna a lo ni dawn. Keini hi lungpui ang maiin kan au ve lawm lawm a ni?
PMGSY sum hmanga kawngpui laih hna an thawh Ngaizawl kawng siam mekah kan Speaker ber mai chu nuai 100 ei ah an puh rup mai. Chhei le! A tak a nih ngai chuan mipuiin an dem luai luai tur a nih laiin, a dik loa nih chuan a puhtute hi Jail rûn thima zak taka awm tura khung tlak an ni. 
Nuai 1 pawh ni lo, nuai 20 pawh ni lo, nuai 40 pawh ni lo; nuai 100 zet fanghma no ei hmiaha inpuhna tluka mihring damlai inpuh chhiatna hi eiruk thilah chuan Mizoram chhungah chuan a awm lo a tih theih hial awm e, mahsela he inpuhna hi tunah chuan an sawi zui leh ta mang der lo a nia! 
Keini lam hi chuan documentary proof lam nei mah suh ila kan Assembly rorelna tibuai nak khawpa inpuhna tih chin hi kan han sawi zui ve mai mai dawn a. Eptu MLA rualin Assembly House rorel an chhuah san rap rap na tham inpuhna hi a te lo tih hi Zoram mipui hian i hria ang u khai. 
He thil hi Taikheri chanchin leh Kasauti kan sawi zui ang chen pawha kan sawi zui lo a nih si chuan tu hi nge maw eiruk duh lo tak taktu chu ni ta ang le? He thilah hian Speaker hi a thiam lo tih leh a thiam tih pawh hriat a la ni lova inpuhna awm dan zawka hi a ni kan khel zui ngai chu ni. 
Hnathawhna tur sum tam tak awm hi politician te hian an 'ṭham' tawp tawp zel nia ngaih theih turin inpuhna lian tak a awm a. Speaker hi chu a lo fihlim a nih pawhin politician zingah fihlim lo tam tak an awm niin a rin theih ta a ni. 
Congress Legis­lature Party leh ZPM Legislature Party khanin kan Assembly Speaker-in mi con­tract hnathawhah cheng nuai 100 a lo ei tih voice record chiang taka sawi chhuah a nih vangin Assembly House hial an chhuah­san kha a nia. Ngaizawl All NGO leh VC Coordination Committee chuan he kawng siam hna hi Collin Lalsangpuii hminga hmuh a ni an ti a, chutah chuan estimate pawisa awm sa aṭang chuan cheng nuai 100 lo fang­hma no eitu an awm tih hi an sawi bawk a ni. 
Ka Mizopui mipui­te u, han ngaih­tuah chiang mah teh u, cheng nuai 100 zet hi zawng i zawng hmu teh ang u. 
- Lalrammawia