Thil man hrût rual chungchang
Mizoramah hian sumdawng pawl emaw, pawl dang emawte'n thil man inang tlang ni tura an hrût rual a awm fo tawh a; hetiang hi kei, thil ṭha takah pawh ka ngai ve lem lo.
Hman deuh, thlalak print kan uar lai khan thlalak print-na dàwr ho khan print man kha inang tlang turin an ti a, chu'ngte chu mipui hriat tur pawhin an puangzar ṭhin. Kha kha ṭha lo zawk ka lo ti ve ṭhin a. A chhan chu - sumdawng an ni a, dawrtu (customer) duh an ni a. Mipuiin an pan duh theih nan mipui hîp thei turin hlawkna awm tho siin rate tihhniam lamah an inel turah ka ngai a. An khawl neih ṭhat dan azir te, an hmunhma azir te, dawr an luah man azirtein a man an bithliah mai turah ka ngai a ni.
Mipa lu meh man chungchang pawh hi sawi a awm fo. Lu mêttu pawlin Aizawl pum huap turin lu meh man an bithliah fo a, chutih laiin, khawtlanga thuneitute lamin an lo bithliah ve fo bawk a. Hengte hi thil ṭul lo ve veah ka ngai.
Lu mettute hi an inang lo. An thiam dan (skill) a inang lo a, hmanrua leh bungrua an hman a inang lo a, service an pek a inang lo a, lu mehna hmun faina leh thiamhlimna lama dinhmunte a inang lo a, an hmun (dawr) luah man a inang lo nasa mai bawk. Heng zawng zawng avang hian mipa lu meh man hi hrût rual a remchang lo a ni.
Lu mettu chuan lu a mehna atana a senso zawng zawng leh lu a meh zat tlangpuite chhûtin, a skill ngaihtuah chungin lu meh man siam mai se. A pan ngamin an pan ang a, pan duh loin an pan lo mai ta lâwng. Hei hian a ken tel tam tak a nei a, customer nei ṭha turin lu mettute chu an inel ang a, an service a ṭhat phah sawt thei dawn a ni.
Hmeichhia sam siam man, hmui/hmai/biang chei man pawh a inang lo zung a ni awm a. Anni pawh a chunga kan sawi ang khian, an dinhmun azirin rate an insiam mai a ni ngei ang. Hmeichhe tih dan ang hian mipa lu meh man chungchang pawh thlir thei ila a ṭha phian ang maw le.
Heng kan sawi rual hian, mipui ni tin mamawh (essential commodity)-te erawh a dan a dang leh daih thung. Chawhmeh chi hrang hrang mante hi chu mipui harsatna thlen khawpa a zuartute'n an tihsan loh nan khuahkhirh a ṭul a, khuahkhirh turin sorkar pawhin dan a nei rêng a, mahse, sorkar hi a che ṭha duh lo mai zawk a ni.
- K. Zoramchhana