Chapchar Kût thingtlang lamah
He rawtna hi Vanglaini leh Lunglei chanchinbu-ah te ṭum thum ka ziahna a ni ta. He kût leh a dangte pawh mahni awmhmunah theih ang leh duh ang te te-in hmanlai chuan an hmang lêt lêt ni mai awmah ka ngai a. Tunhnu hian Sorkar meuhin buaipuiin a neitu chan a inti chang ta hluai mai a. Pisa zawng zawng kharin awmni khamin sum tam tak sêngin khawpui-ah chauh kan hmang ta luai luai mai. Phuahchawpin 'Khuallian' kan ti, 'Kût Pa' kan ti, 'Miss Chapchar Kut' te kan ti zel a.
State pachhia leh leiba ngah tak e ti lo hian 'lawmman' inpek leh sem te hi kan uar phian a, mimal leh group zaithiam kan tih te 'lawmman' kan han inpe ta zel bawk a. Kût ṭobul inhrilhchianna awm mang lovin tunlai style-in nuam kan tawl ni berin a lang ta. Tunlai ṭhangtharte hian a awmzia hre lovin hriat pawh tum lem lovin a phawvuakah hlim tum takin an tel ve mai mai ta a nih hi maw.
Heti taka he kût hi kan uar a, kan ngaih pawimawh takah chuan khawpuiah chauh hmang lovin thingtlang khaw hrang hrangah te an hman ve dan tur kan ngaihtuah puiin kan siamsak ve em? Sorkar leh he kût ngaihtuah ṭhintute hian hei hi ngaihtuahin thingtlang lama kan mite lo intihhlim ve na tur hi siamsak ve se, sum pawh engemawzat pe ve se tih hi ka han rawt nawn leh a ni.
Khawpuiah chuan kan ti zing tawh a, kan programme te lah a pangngai deuh hlir a ni mai si a, ngai-ah kan neih tawh a, kan phur tehchiam tawh lo a nih hi. Lam tur leh zai tur bakah va en a, va ngaithla tur hrim hrima thawkchhuak hi chu kan tam tawh vak lovin a lang. Chuvangin, kum hnih/ khat te chu kût tawh lo mah ila pawi ti leh lungnilo kan awm vak pawh a rinawm love.
Hetiang hi kan kalphung a nih laiin thingtlanga kan mite, khawpuia mite aia tam zawk daih hian he kût hi eng angin nge an hman ve ṭhin? tih te kan ngaihtuah ngai em aw? Kût a ni tih pawh hre lem lo, a hre chhun pawhin engtin han hman tehchiam dan tur pawh hre chuang lo, an awm pangngaia awm mai an nih te ka han ring ringawt a; Sorkar meuhin programme te duan sakin khawpuia a tih sak ang te hian han tihpui se chuan an hlimin khawpuia mite ai mah hian nuam an ti zawk mai thei asin!
Chu tak chu an duhsakawm ve a ni lo'm ni?
A tih dan tur - Ṭum khatah khua zawng zawnga kût chi chu a ni lovang tih chu hriatsa a ni. RD Block tinah erawh chuan a tih theih ang. Chutah pawh Block chhunga khua zawng zawng chuan ṭum khata tih chu a tih chi chuang lovang a, kum khatah khaw 3 khaw 4, a kum lehah khawdang, chutiang chuan an in-kût chhawk thei ang.
A hmanpui turin Block Official bakah District Official ṭhenkhat, Aizawl aṭang te pawhin a in-detail theih ang. Senso pangngaiin kan thingtlang unaute lo intihlimin lo kût ve ṭhin se tih hi an duhsak-awm em em a ni. A ṭul chuan khawpui mite'n kianin kût loh phah te lo inhuam ve mai ila. Kan kût zing tawh narawh hlawm e.
Kumin atan chuan a tlai zo ta. Nakum lam atan chuan hetiang zâwng hian ngaihtuahna lo sêng ve ula, ṭha ti lo leh a harsat dan tur emaw, ṭha ti ve chuan a ṭhat dan tur te han sawi ve sup sup ula kan sorkar pawhin beng lo chhiin a la tihlawhtling mial mai thei a nia!
- C.Lalsangliana, Lunglei