Chapchar Kut
Mi hnamte chuan an hnam kut hi tih takzetin an lawm a, an hnam kut a lo thlen dawn chuan chhungkuain eng programme emaw an siam a, an nun a nghawng ṭhin a ni ngai e. Keini chuan kan kut hi field leh hall-a lawm tur emaw kan ti tawh a, Aizawl leh khawpui danga kut hmangtute chuan field leh hall-ah kan hmang leh fur dawn a ni.
Kut a nih hi chuan chhungkaw nun a khawih turah ka ngai a, kutpui kan hmang a nih chuan khawtlangin kan zi mup mup turah ka ngai a, chu chu kut (festival) ka hmelhriat ve thiam dan chu a ni. Tuna Mizorama kan kut hman dan chu Central YMA-in lam intihsiak buatsaih se, chutah chuan thusawi leh zai telh se, a tawpah concert ti leh se, chu nen chuan a danglamna a awm lo. Min ko khawm a, politician-te’n an duhzawng an sawina hmun tho a ni.
Khawvelin hma a sawn zel avangin heng puipunte hi camera nei ṭha tak takte inlanna hun a ni a, thla lak tum hi an inpel suau suau
ṭhin a, heng nikhua hian thla la thei chin hi chu insiam a hun tawh. Journalist rual an awm a, anni hi chu sawi lova lum an ni a, heng bakah hian professional photographer thlan chhuah tlem rem rawm chiah hi thlalatu atan hian ruai se, tuna mi hi chu a chhangchhe ṭhin khawp mai.
Tichuan kut chu han sawi leh ta ṭhin ila, field pakhata ‘centralised’ lo hian mahni khawtlangah seng lut thei ila. Chapchar Kut chhunah kan hmang thei lo a nih pawhin zanahte hmang ila, a YMA tehreng pawh hian sorkar suma Lammual leh district headquarters tina field lian bera hmang lo hian tih dan dang deuhin an hmang thiam lo em ni? Chapchar Kut hi YMA Branch hian kengkawh tawh ila, mahni khua leh vengah chai mup mup mai ila, chu chu ṭhalaite tan pawh nghahhlelhawm a ni dawn a ni.
Hmun khata inkoh khawm a, in kut tir tum hi chu concert chi khat siamna a ni a, Aizawlah phei chuan football khelhna tur liau liaua siam leh sorkar pawhin an lei phul lemah an han pungkhawm leh tak tak ang a, hmasawnna hmuh tur a awm leh miah lo ang. Lammual hi Mizorama grass zinga chhe ber an ti hial tawh a ni awm e.
Engpawhnise Chapchar Kut hi kan hmang leh dawn a nih chuan de-centralis-ed ni se, mipui ko khawma politician-te thusawina remchang mai ni tawh lo se, tun anga inkoh khawm hi chu kut ni lovin ‘cultural function cum concert cum camera show’ a ang ber mai.
- Lalṭanpuia