CHANGKANNA - LESS PAPERWORK LEH PAPERLESS WORLD

"Green Channel hmang ṭangkai la, thing leh mau i humhalh a ni mai" tih hi counter-ah kan târ a. Ṭhenkhat chuan, "A va inkaihhnawih lo em!" an ti a, an nui hak hak

ṭhin. A ṭhen chuan, "I thil târ hi eng nge a awmzia? A va inpersan em em ve!" an ti ve bawk a. "Green tih lai hian thil hring, thing leh mau te a kâwk a, lehkha phêk hlai pui pui, cheque leh withdrawal slip hmang loa card in hman hian paper in tihek lo a. Paper a hek loh miau chuan paper siamtute pawhin an siam tlem phah dawn a. Paper siamtute'n an siam tlem phah na na na chuan a siamna hmanrua thing leh mau pawh a hek lo sawt dawn a ni. Chu chu Green Channel hian a tum a ni," ka ti ta ṭhin a; ṭhenkhat chu an bu ve nghut nghut.

Mi nuai khatin, paper aia card kan hman vek chuan, vawi khat chauh pawh ni se, paper kan save tam turzia mai chu! Hei vang hian a nia bank tam takin card hmang tura an customer-te an nawr fo ṭhin ni. Card hman thiam loh leh hman ṭhat duh lohte hi intihtheihna chi a lo ni miah lo; a changkan loh bakah kan natural resource tan hmelma nihna a ni. Green channel chauh ni loin ATM booth pawh hman uar tur. Office-a chawlh hahdam nilena thla tawpa hlawh lak leh rikngawt ai chuan ram leh hnam tan kan thawh hlawk zawk ang; rawtuai khawrh khap vak aiin a sâwt zawk dawn chiang râp.

Lo nei mi tan phei chuan hman uar lehzual bik a ngai; loh theih loha thing leh mau tichereutu kan ni a, paper hman tlem lamah tal ṭan kan lak loh te chuan... Changkan duh vek kan ni, paper hman tlêm zawk hi a ni changkanna chu lo ni. Hetiang hi a hmu lâwk nge, American actress/ singer Pearl Bailey (1918 - 1990) chuan, “What the world really needs is more love and less paperwork” te a lo ti lungrun daih tawh vel.

A chunga mi khi “less paperwork” chu a ni ber a; tunah chuan “paperless world” lamah kan pakai tawh ang. Tunlai khawvelah chuan thil engkim hi internet aṭangin a lei theih titih tawh. Bazara ni tin ei chawp tur em em hi chu a rem lo, tih a ni mai. Mi pawisa thawn, TV leh phone ilo bill pek, pawisa dah pun, thil engkim a tih theih vek a. Green channel leh ATM booth aiin paper a la hek lo lehzual a, paper a tel tawh lo titih zawk. Chu bakah, pawisa chhia a awm ve lo, a lem pawh a awm lo, signature dik lo tih vel a awm bawk si lo; mi mâwl tan hlei hlei hei lo liama holy hot dog.

LalModi-a hian tun hma deuh aṭang tawh khan Digital India Programme a ti a. India mipuite hian internet hmang thei vek ila, internet hmang chuan kan thil mamawh tam zawk hi mahni in lum aṭang te, kan awmhmun khawi hmun aṭang te pawha kan pawisa kan khawih chêt theihna tur programme a ni. “Faceless, paperless, cashless” tih hi an thupui a ni; mi hmai sâ tâwn loin (faceless), lehkha hmang loin (paperless), pawisa fâi khawih bawk si loin (cashless) engkim hi tih zeih zeih tawh tur tih a ni ber.

Bank hrang hrang hian internet banking hi an lo tlangaupui tawh ṭhin a; mahse, mi tam zawk rilrûah a tla na thei tlat lo. Tunah pawisa thih denchhenin, mipui kan harh thar ta a; tih dan kan dap ta a. Eng nge a awmzia hre miah lote pawhin, “Internet banking tih ve vat a ngai,” an ti ve ta zet zet mai a. Hmasawnna ropui tak a va ni em! Internet banking hi intihmuh ang u, Hollywood movie chhuak thar en hmasa thei aiin internet banking hmang ṭhin hi an changkang zawk. Cashless transaction hi hmun hrang hrangah tlangaupui mêk a ni a; sakawlh chhuak thar hre thei deuhte leh khawchhak lungpui China tih vel buaipuitute thu leh hla lawilo mai mai ngaihven loin kan account neihna bank-ah ṭheuh internet banking te hi i apply sup sup ang u khai.

- Rempuia R. Lûtmâng