CHAPCHAR KUT URLAWK ANG

Mizote kut ropui leh ngaihhlut ber chu naktuk mai hian lawm a ni leh dawn ta a, a phurawm tawh hle mai.

Kum tina hman ṭhin a nih avangin kut hman dan chung­changah pawh rawtna hrang hrang a awm tawh ṭhin a, hma pawh kan sawn mek zel e. Rawtna pakhat ka han siam ve teh ang.

Thlalak chung­chang : Kut ropui lawm tur hian Aizawl veng hrang hrang bakah, khaw hrang hrang aṭang tein kan fuan khawm ṭhin a, state dang leh ram pawn aṭang pawhin chhimtu an pung chho mek zel a ni. Kut lawm tura kalte chuan Mizo thuamhnaw inbelin, mawi takin kan inchei ṭhin a, hmuh a nuam ṭhin hle.

Hetih hunah hian mitinin thlalak ṭha neih kan duh ṭhin a, a awm reng lah tak a! He hunah hian thla la tur bik ruat nge ṭha ang a, a duh apiang lak theiha phalral mai ṭha zawk ang tih chu ngaituah tham tak a tling.

Sorkarin mumal taka thla latu tur biak a ruat a nih chuan a ṭha a, a ruat lem lo a nih pawhin a pawina a awm hran lo. A changtu Deparment-in ruahmanna felfai tak siam a, thlalatu tur biak a ruai a nih chuan a rawiha te hian sorkarah an thlalak neihte an pelut ang a, Deparment-in a duh apiang tana lakchhawn (copy) theihin a siam tur a ni. Kum dangah pawh mahni veng aiawha Cheraw kantuten an thlak an hmu zui lo fo tawh tlat! Veng hminga item nei te, mimal item nei te leh, nei ve lem lote pawhin an thlak an hmuh let theihna turin kawng hawn sak an ngai a ni.

Chutih rualin thlalatu tur bik sor­karin a ruai lo a, a duh apiang tana lak theih a nih chuan, ruahmanna felfai tak siam a ngai. Field chhungah a duh a piang tana luh theih a nih chuan program tibuai thei khawpin a hnawk thei. Chumi a nih avang chuan veng leh mimal item nei turten thla laksaktu tur pakhat nei se la, anni tan hian chhianchhiahna awrh tur siam sak mai nise, veng hming emaw tarlan sak mai ni bawk se. Hei hian thlalak hmuh let lehna kawngah nasa takin a pui ang a, kan kut ropui ber lawma kan hlim lai thla te awlsam zawkin kan nei thei dawn a ni.

Thlalak leh video-te hi nakin hun thlenga vawn ṭhat leh dah ṭhat theih a nih avangin a hlu tak zet a ni.

Hetih rual hian kan media mite chu sawi ngai loa an duhna hmuna kal phalsak nise a ṭha hle ang. Chapchar Kut hlim taka hmang ṭheuh turin duhsakna ka hlan a che u.

- Matea Pa