AW! ZORAM, I MALSAWMNA HLU…
Myanmar ram chhung buaina avang hian tual chhung mi a nuai tel, ram chhung tlang karah leh ram pawnah mangang thlabarin an tlanchhiat thu kan hre tawh ngei ang. Fur ruah tui thlak laia ram hnuai leh khamranga kara raltlante dinhmun han ngaihtuah hian hnuk a ulh a ni.
Ei leh in chu sawi loh awm hulna takngail pawh an indaih lo a, naupang leh upa lam tawh tan phei chuan a khirh lehzual ang. Damdawi ei mai tur an neih loh avanga khawsik, pum na, khawṭhalo, lu na, thak neuh neuh leh chau tawngkhaw te pawh an awm nuk awm si a, lainatawm tak an em!
Heng raltlan zingah hian Chin State leh Kalay-Kabaw huam chhunga tlang mite leh hnam dangte pawh a sing tel an awm a. Myanmar aṭanga Mizorama raltlan hi mi 40000 chuang an awm tawh nia hriat a ni bawk. Chhungkhat laina, ṭhian ṭha leh hmelhriatte hnena tlu lut pawh an awm nual ang.
A bik takin Chin State-a raltlante hi an dinhmun a hrehawm lehzual. In leh lo tlanchhiatsanin an hak lai nen chauha raltlan an ni ber a, an dinhmun a derthawng hle.
Hetia mangang thlabara tlanchhiatna tur Zo-Paradisem Mizoram a awm avang leh sorkar chauh pawh ni lo, Kohhran leh YMA bakah tlawmngai pawl hrang hrangten duat taka vawiin thlenga an tuamhlawm thei reng hi ‘Aw Zoram, i malsamna hlu, kan engkim chuangah a lang’ tih loh rual a ni lo.
Zoram khawvela Zo hnahthlakte Jerusalem hi Myanmar-a MP, CAM, CM, MLA, Administor, Sipai leh Sipai Officer, Ukil, Police, Zirtirtu, Doctor leh Nurse, Sorkar hnathawkte leh Party-a a kultaite bakah kawngzawh boruak vela a phusa pawlten CDM-a lut leh mipui raltlanten inhnangfak nan an hmang mek a ni.
Zohnahthlakte chauh pawh ni lo, Myanmar mi leh sa, Kawl leh Vai hnam dang chenin an la duat thei zel hi a ropui a ni. Refugee Camp-a tlawhtu Tluanga Chhakchhuak chuan ‘Tlawmngai pawl hrang hranga thilpek tling khawm aṭangin kan ṭanpui ve ṭhin a. Camp-a nu pakhat phei chu min hmuh hian a lawm lutuk a, a ṭap ringawt. Thenkhat chu an phunchiar lek lek thung a, thil awmzia kan sawi a, an ziaawm leh mai’ tia a sawi hian ngaihtuah a titam hle.
Kum khat chuang tehmeuh raltlan, mi a sing tel enkawl hna thawktu Mizoram lam inpekna hi thil awlai lo tak a ni. India sorkar laipui a chet duh miau si loh chuan Mizoram sorkar, Kohhran, YMA leh tlawmngai pawlte pawh lu a hai duh ngawt ang le.
Eng pawh ni se, kan duh vang leh duh loh vang pawh ni lo, Myanmar ram buaina avanga Mizorama raltlan leh tlan lo awm zawng zawngte duat taka min kuangkuah a, a ṭulna apianga luang chhuak ṭhin Mizoram sorkar, Kohhran, YMA leh tlawmngai pawl hrang hrangte hnathawh hi a ropui e.
- Zalianthanga, Tahan