Fa nei tam ang u...!

Mithiamte chuan heti hian an ti, nupa in fa pahnih an neih hian, an nu leh pa thlaktu tur chiah an ni - fa pahnih an neih chuan pun belhna a awm lo. Chuvangin pung tur chuan nupa hian fa pahnih aia tam an neih a ngai tihna a ni.

Mizoram Prebyterian Kohhran Hmeichhe Rorel Inkhawm chuan fa neih tam an rel thu chanchinbu lamah ka lo hria a, kei a fa la nei lo ber hian ka thlawp thlap. Fa nei tura ṭan lak chhunzawm ve nghal mai pawh ka duh rum rum, hunin a la hril ang chu.

Tunlai Mizo ṭhalai tam takin nupui pasal neih an ngaihsak lo, ṭhenkhat ngaihsak lo tak tak an awm laiin ṭhenkhat erawh an khawsakna dinhmunin a zir loh avanga nupui pasal nei ngam lo pawh an tam, dinhmun erawh a inang vek thei lo ang.

Mizo pa langsar Pu Vanneihtlanga podcast ka lo ngaithla a, nula leh tlangval te innei a, fa nei pung turin a fuih. Sawiseltu an tam, midang nundan leh khawsak dan hriat pui lo chunga nupui pasal nei tura a fuih ngawt khan titi pawh a ti tam.

Mahse, thlawptu lam an ṭhahnem zawk awm e. Vnt hi a tim phah lo a, a hnuah fa neih uar tur leh innei tam turin a fuih nawn - thulengvak leh mi selna karah pawh a dinna ngaiah a dingnghet a, a din ngheh chhan chu zirchianna mumal tak a neih hmasak vang a ni.

United States rama hmun ropui World Trade Center an tih chhiat hnuah, firfiaka chetna la tam mah se Muslim hoin tharum thawhna rapthlak aiin fa neih tam a, pawisa hmanga ram lak a finthlak tih an hre chhuak, an hmalak dan an thlak daih.

Europe-ah Muslim an inthlahpung nasa, kristiam tamna ram ni ṭhin France chu a buai langsar an ni mek. An rama kristian piang aiin Muslim piang an tam zawk - Muslim nu ten fa neih tlem aiin neih tam an tuipui zawk, nakin lawkah chuan duh lo mah se Muslim hoin ram rorelna an la luah dawn.

Arab miten an sum hmangin Europe-a roreltu nih an tum zel bawk. Muslim sum­dawng hausa te chuan Europe miten football an ngainat zia an hria, hei vang hian football club neitu an ni ta fur mai - silai leh bomb ai chuan football hmanga hmalak hian a thawk chak mai thei.

France rama club lian ber Paris Saint-Germain neitu chu Arab mi an ni, England rama league sang ber Premier League thununtu Manchester City neitu pawh Muslim sumdawng hausa tho an ni - uchuak taka Newcastle United leitute pawh Arab mi tho, sawi sen a ni lo zawk.

Europe hnam fing ho pawh chimral theih dinhmunah an ding a nih chuan, keini Mizote phei chu kan dinhmun a him bik lo tih kan hriat a ngai. Kan chhehvelah ram mumal nei lo - Chakma leh Bru te an awm reng, anni hian kan luah peih loh leh luahtu awm lohna hmun an luah zel.

Anni pahnih chauh hi an ni lo - Rohingya mipui tam tak chu kan bul hnai lawkah ram neih tumin an awm kual ve reng. Mizote hi kan inthlah pun loh a, keini aia kan chheh vela hnam dangte an pung chak a nih chuan, kan ram ngei hi min chuhpui dawn.

Dan hmangin in­khungbing mah ila, kan ram sorkar hma­lak duh dan kan hria. Thuneituten an thunun ngam loh khawp a hnawk hi kan chheh­velah an awm thuai dawn, chuvangin Mizo­ram luah lum a, luah khat tur hian Mizote kan inthlah pun a ngai.

- Lal Thansanga