RAM PUM HUAPIN ZU KAN RUI ELO?! EMAW NI?!

India President thi ta Dr. A.P.J. Abdul Kalam khan vawi khat chu Indian (Vai) hote fuih nan tiin thu a sawi a, "Singapore-ah ram dangah te i zin a, chung i zinna ram khawpui kawtthlerah chil i chhak ngai lova. I meizial bung pawh i paih ringawt ngai lo, zei takin i khawsa thei a. Mahse, i ramah i lo haw/ kir leh a, ram dang khawpuia i tih duh loh kha i ram khawpuiah chuan meizial bung kawtthlerah paih­in, kawtthlerah chil i chhak sen leh ngiai nguau duh a, nang­mah tho kha i ni a, engtinnge kan ram kan tihchangkan/ tihthianghlim ang a, kan tih hmasawn ang? " a ti e an ti.

Mizote pawh Mizo­ram state pawn leh ram dang (foreign) a zin chhuakin, chutah zu zawrhna/zu dawr te chu engah mah ngai lovin, dawr dang ang bawkin kan kal pel satliah mai thei a! Hnam dangte ang bawkin, eng vakah kan ngai lo. Kawtthlera zu rui kal pai chhe chhu hmuh pawhin, mak tiin ha hipa sawiin, hmusit leh entleu takin kan thlir liam satliah mai mai thei.

Mahse, Mizo­ramah i haw/ kir leh a, state dang leh ram danga engah mah i ngaih loh, i thlir/ en nawn ngai loh, a rui (abuse) tute lek phei chu hmusit em em ṭhintu khan, mahni ramah leh chhungkuaah i nuihzat leh entleu, hmusit em em zu chu i lo ngaisang thar leh thut a. I thlung lu te chu ti hai chheih chhuih duhin, rilru leh mit khaw hmuh ti nu bual leh mit kawhmuh tivai ruai a, ti phe chhuih duhin i lo awm leh duh tlat mai si a!

State pawna i en liam mai mai ṭhin zu leh a dawrte chu i lo ngaisang thar leh ta thut emaw ni? 'Ramhuai tuibur' leh 'sual tinreng bul' tiin i han haw thar leh ta em em a! I ruih duh miah loh leh in (drink) duh miah loh 'thil' chu i han ngaisang thar leh vel chiam a (emaw ni?!) Zu han ruihte chu mi engemaw nihna takah te ngai thar leh thutin, Setana aia zu huat em em te chu 'thlarau mi' nihna leh 'ram leh hnam hmangaihna leh veina' thilah i lo ngai thar leh ta emaw ni? 'Zu' tih ringawt pawh i han do bur duh ta zel mai a, thil mak ve tak chu a ni e!

Vairam leh foreign i zin changa 'engah­mah i ngaih loh' thil chu i han ngaihlu leh ngai mawh thar vel ṭhin te hi, thil mak ve tak a lo ni e. Mahni khaw tualah zu in duh lo khan, chhungte leh kohhran hote hmuh phak loh nia i hriat chinah rui chhu khawpin i in leh duh si te kha, a mak a ni ti raw?

Khawi hmunah pawh, "Nang­mah kha, nangmah lo ni zel rawh" Sap hovin, 'Be Yourself' an lo tih ṭhin kha mawle...

- CT Lalrinawma