Hnatlanga thlanmual tihfai!
Thiamna a sang zel a, kan khawhawi a zau telh telh a, ram tin deuh thawah Mizote pawh kan in zar pharh tawh a. Kan pi leh puten hnatlanga thlanmual tih fai chu a ṭha lo, mitthi an inzawm duh (rual u zawk te leh, upa zawkte thusawi ka hriat) tia an lo sawi hi tunlai thleng hian dik turah kan la ngaih tlat vang nge ni, Aizawl veng ṭhenkhat tih loh Mizorama khaw tin deuh thaw leh veng tin deuh thaw hi chuan hnatlanga thlanmual tih fai hi kan la duh hlawm chiah loh.
Kan ramah kristianna a rawn luh hma kha chuan hman lai kan pi leh pute kha chuan thil hlauh leh serh an ngah a. Kristianna a rawn luh chinah erawh thil hlauh leh puithuna ṭhenkhat ang chi pawh kan nei tlemin, kan bansan ta nual a, la bansan loh ṭhenkhat erawh a la awm; hnatlanga thlanmual tih fai hi.
Mihringte hi chu thi tur kan ni. Kan nu leh pa, kan u leh nau, kan ṭhian leh rualte hi kan duh emaw duh lo emaw mittui nen kan la thlah liam reng dawn. Chu thil chu hnatlanga thlanmual kan tih fai tak avanga pumpelh theih leh, tih tam phah theih a ni ngawt hian a lang lo. Chuvang chuan, kan veng leh khua thlanmual ṭheuh hi a fai thei ang berin siam i tum zawk teh ang u.
Hnatlanga thlanmual ti fai ṭhin veng hi mitthi an neih tam phah sawt leh sawt lohte zawt ta ila? Chutiang ni lova, kan pi leh puten thiang lo ang leh, mitthi tam phahna tur anga an lo ngaihna tunlai thlenga a finfiahna pawh awm hauh si lo a, kan thlanmual hmunte kan la ti fai hreh a, hnim em em maia veng tam zawk leh khaw tam zawkina kan thlanmualte kan la dah fo mai hi chu bansan a hun tawh viau lo'ng maw? Kan thlanmualte hi kan veng hmelhmang lanna pakhat a ni ve si a, mumal takin enkawl ṭheuh ang u.
Veng mipuiten hnatlanga thlanmual kan tih fai avanga mitthi tam phah tura kan rin lai hian, ti nge mimalin an chhungte thlan an tih fai hian mitthi tam phah tur angah kan ngaih leh si miah loh le?
Kan pi leh puten an lo sawi leh an lo serh te, puithuna ṭhenkhat kha a vaia dik vek tur anga la ngaih tlat hi keini Pathian nung ringtu inti te tan chuan a dik chiah tawh lo a ni. Chutih rual erawh chuan a vaia han rin loh bur erawh chu a dik lo ve thei tho bawk a.
Thil hlauh leh thil serh ngah lutuk te, puithuna lam buaipui lutuk te hi chu Pathian thu nen chuan a inmil chiah lo a ni.
- Nawlchunga Chinjah, Siaha