Damna ṭheuh ṭheuh (alternative medicine)

Mitinin damdawi kan duh a, kan dam loh chuan doctor thiam leh damdawi in ṭha kan pan theih apiang kan pan ṭhin. Doctor pangngaia kan bei a dawn hnu pawhin, ṭawngṭai dam thei kan la pan tal ṭhin.

Tun ṭumah hian, alternative medicine chungchang ka han ziak a. Alternative medicine hmangtute zingah Pharmacist training chhuak Lalbiakthanga hi chhui tel ta ila. Mi tam tak sawi dan aṭangin damdawi in pangngaia beidawng Pu Lalbiakthanga pana dam ta hi an ṭhahnem ve hle tih a hriat. An ni chang lo pawh heng alternative medicine hmanga damna chang ta sawi tur an ṭhahnem ve hle ang. Chuti a nih chuan, alternative medicine leh a thiamna hi rintlak a ni em? tih hi kan chhui chian tur chu a ni. Tin, Mizoram chhung mai ni lo, State dangah pawh he mi chungchangah hian thu leh hla a tam viau niin a lang a, Supreme Court hial a lo thleng tawh a ni.

1. Alternative medicine: Kerala State khu Ramhmul damdawi leh Ayush damdawi lamah hian hma nasa taka latu an ni a. Kan hriat

ṭhan pangngai Hospital leh doctor-te bakah hian Registered Medical Practitioner - Alternative Medicine (RMP-AM) te pawh hi damlo enkawl chungchangah qualify an ni. India rama State hrang hrang leh Central Sawrkar hian a pawnga takin a hrem ngawt thei lo. Chutichuan, India Board Of Alternative Medicine (IBAM) hriatpuia doctor-te leh Pharmacist-te hi ‘a lem’ tia lo hnawl emaw, thu buai lo siam sak hi thil dik a ni lo. He mi thuah hian mi ṭhenkhatin, Medical Council Of India a registered kher lo chu, a lem ang deuha an sawi hi a lo dik ziktluak lo (vide Letter No. MCI-34(1)/96 Med.(10984)).

2. India Board of Alternative Medicine: He IBAM hian 80 Chowringhee Road, Kolkata - 700020, India-ah Office an nei a. Hei hi Central Govt. Act, XXI 0f 1960 behchhanin West Bengal Sawrkar chuan Act, XXVI of 1961 hmangin an Registered thlap a ni. Hei hi “Open International University For Complementary Medicines” ah a in affiliate a, UNO pawhin hei hi a hriatpui (recognised) a ni. He Board hian Alternative Medicine lama doctor zirnate a kengkawh mek a, Zofate pawh he Board-in a hriatpui zirna (Institution) ah hian lutin Doctor Certificate-te leh Diploma certificate-te an pe chhuak ṭhin a ni.

Chutichuan Damdawi in kan hriat ṭhan pangngai leh doctor MBBS, MD etc,.. kan lo hriat leh rawn ṭhin pangngai ni lo deuha damlo enkawlna hi mi ṭhenkhatin an hnualsuat a,

ṭhenkhat phei chuan heng - Electro Homoeopathy Alopathy, Occupuncture etc,.. te leh Alternative Medicine lam zirna Doctor Certificate leh Diploma Certificate neite damdawi chawhte hi ringhlelin an sawisel a, a theih dan ang anga tihbuai leh hek phet kan tum hi thil ṭha lo tak a ni.

Doctor pangngai kal zen zen phak lohnaah te kalin damdawite an chawh ṭhin a, dam pui an awm a, dam pui mai lote pawh an awm ang; chu chu khawvel awm dan a ni. Civil Hospital-a lut zawng zawng an dam vek lova, doctor specialist-in a chawh damdawi ei an dam vek bawk hek lo. Itsik vang nge, huphurh vang, heng Alternative Medicine hmangtute hian vau ti tih leh sawi chhiat an hlawh bik deuh em aw a tih theih. Entirnan, Pu Lalbiakthanga hi Pharmacist a ni a, kum 50 lai a practise tawh, mi tam takin a damdawi leh a enkawlna an dam pui a. Civil Hospital a beidawng, amah pantu dam ta hlauh te eng emaw zat an awm. An dam vek e phei zawng a tih theih loh. Khawlai ti tiah hian sawi nep tawk an awm reng.

Chutiangin, Dr. Zahawma pawh tunah Lawngtlai lamah an man an ti a. Hmanah Dr. Dorema, Dr. Aichhunga leh Dr. Chawngliana te pawh tihbuai an ni. An buai dan chhan leh vang ka hre lo nain, kan hriat ṭhan, MBBS doctor an nih loh vanga zuam leh hek tawk ta bik an ang hle.

Chutiangin, ramhmul damdawite pawh certificate nei hauh lovin tam takin an siam a, kan eiin kan in a, ṭhat phah kan awm a, ṭhat phah lo kan awm bawk. An sum hrawm a na lo deuh a, kan ngaimawh lo mai niin a lang. Tuna kan sawi alternative medicine hmangtute erawh hi chuan sawisel leh vau ti tih an tawk zing deuh a ang khawp mai. (Pu Lalbiakthanga pawhin Official takin vauna a tawk tawh.)

Chutichuan, India Board Of Alternative Medicine hriatpuia zir chhuak doctor-te hi a pawnga taka hmusit leh hek fo hi kan tih tur niin a lang lo. Doctor leh damdawiin a inenkawlna hrim hrimah erawh hi chuan Zofate hi chu tun aia kan fimkhur leh thu kan chik hi chu a tha hrim hrim a ni.

Court-in engtin nge a ngaih?

Zep tur pawh awm lovin, India ramah hian damdawi inenkawlna pangngai kan hriat bel tawh ni lo hi chuan sawi chu a hlawhin vauna pawh an tawk ṭhin ni tur a ni. India rama Court hrang hrangin Alternative System of Medicine an hmuh dan chu hetiang hi a ni.

1. Karnataka High Court chuan “Heng ang chi damdawi hi hmanga tilar zel tur hian phalna hranpa a ngai lo.” a ti. (Vide Petition No.17534-96/94 etc,.)

2. Delhi High Court chuan, “Heng Alternative Medicine te hi Sawrkarin a pawmpuiin, a ṭanpui zawngin hma a la tur a ni,” a ti. (Vide CWP NO. 4015/1996 & OM NO. 8468/1997)

3. Culcutta High Court chuan, “India ramah hian, tualṭo damdawi hman hi dan angin a thiang a ni” a ti. (Vide CLS Page No. 173 to 187)

4. Supreme Court Of India chuan, “Heng Alternative Medicine hman leh tih hmasawn zelna tura Delhi High Court-in thutlukna a lo siam tawh chu Govt. Of India-in a zawm thlap tur a ni,” a ti.

5. Alternative Medicine hman hi Supreme Court-in a pawmpui tih Maharastra Health Directorate chuan May, 2010 khan a pawm.

6. Bombay High Court-in Electro Homopathy Practice a pawm.

7. Govt. Of India, Ministry Of Health & Family Welfare and Department Of Health Research chuan Electro Homopathy a pawmpui (Recognised).

8. Ni 16-5-2001 khan Metropolitan Session Court chuan, “Electro Homoepathy Practice chu pawmpuiin, India Medical Council reng rengin hemi practice-naah hian inrawlh theihna an nei lo” a ti.

Mialicious prosecution: Tunlai hian Court kal kan inthihhmuh ta viau a, thiam thu sawi nan chuan a ṭha e. Chutih rual chuan eng emaw a chhan ho tak leh ṭul lo puia mi thubuai awrh tir hi khin let theih an ni tih hi hriat tur a ni. Chu chu Mialicious prosecution an ti. Document en chian loh avang te, thil hriat chian tawk loh vang te, dawt phuahchawpa midang Court-a thu buai siamsakte hi - court thuthlukna siam hnuah khin let leh chawi tir theih an ni.

Lawngtlai lama doctor pakhat hek a jail-a tan tirtu pawh a chhan kan va hre pha chiah lo nain, ngaihtuah chian a ngai khawp ang. Heng Alternative Medicine Practitioner te hian an hnathawhnaah thil dik lo tak an ti hranpa a ni loh a, vauna emaw hekna emaw an tawk a nih chuan, chutianga vautu emaw hektu emaw chu a chhan zawh tur a ni a. Chu chu Hon’ble High Court Culcutta-ah thlen vat tur a ni.

Mizorama Alternative Medicine hmangtute pawh intelkhawm a, an dikna chanvo humhalh tura an ṭan rual a ṭha hle ang. Miin damna an hmuhna a nih chuan tualṭo pawh, homoepathy pawh, damdawi pangngai pawh, ṭawngṭaina pawh ni se, tumahin i thik lovang u. Damna ṭheuh ṭheuh.

He India Board Of Alternative Medicine (IBAM) hian International Conference vawi 28-na chu Kolkata-ah Ni 12/1/2017 khan an hmang a. Hetah hian India ram State 21 aṭang­in palai 321 lai an kal khawm a. Mizoram aṭang pawhin doctor pali (4) an tel. PM Narendra Modi pawhin he Conference a duhsakna thute a thawn a, foreign ram 39 aṭangin mi 100 an lo tel a ni. Chuvangin, he Alternative Medicine hi India leh khawvelin pawmin, nasa taka tih hmasawn a tum mek lai a ni. Helaia a pawnga taka lo hnualsuat ngawt chi a ni lo.

- Rualkhuma Hmar