MSL Is Back - Season 7

Kum 1990 chho vêla Aizawl tlangval ṭhenkhat deuh chauhin an atchilh kha hei kum sangbi thar a rawn herchhuah meuh chuan Aizawl tlangval mai ni lovin, District hrang hranga nula leh tlangvalten an buaipui chho a - a ṭhen phei chuan a sing a sing hailuh phah nan an hmang ta! Awmze nei zawk leh hmun hma ṭha zawk chhawpchhuah sak an nih takah chuan diriam taka Mizo ṭhalai tho tlai satliah a puhtute hmui hup sakin an awm a. Za tel teh meuhin zing leh tlaiah basketball an khel ta suau suau - hunawl hman ṭhatna, invawn ulukna, hriselna, sum hailuhna leh zirna in ṭha zawk he game hian Mizo ṭhalaite a pe let ve ta zel mai!

A chi chiah maw? - Mizo in basketball a hmelhriat tirh aṭanga vawiin thlenga inkawp fuh em em chu - he game leh zirna hi a ni. Lak hran leh phel darh theih hauh lovin an inngheng rial a, bul lo tumtuten zirna in hnaih thei ang bera he infiamna hi an lo kuangkuah thiam avangin mi puitling tak tak he game hian a hring chho mawlh mawlh mêk zel a ni. Mi tlem tê erawhin a ler leh a chhip hi eng infiamna discipline-ah pawh an thleng ṭhin tih kan hre vek a, mahni theihna leh thiamna mila hun pek dan tawk thiam erawh kan ngai hle.

Mizo kan tê lutuk- Teuh lo mai, a teuh lo mai. Basketball hi palian khelh chi a ni teh meuh mai. Mahse, fit 6 chuang hi constituency tinah hian political party thar din tham an awm hial ta ve ang. MBBA in ngaihtuahna a seng a, thui tak kal thei khawpa players beiseiawm, he hnam ti hmingthatu tur lah chu MSL hmangin thur chhuah an ni ta nawlh nawlh zui e!

KORN - MSL season 6 khelh zawh a nih meuh chuan Mizoram ramri buai kal pelin, Assam palian hrawl hrep hrup leh North East State te hmaah Mizo tlangval rualin hnehna hlado chhamin Shillong khawpui-ah Mizoram theihna an han phochhuak zet kha chu - a bawn thlawt a ni. NE state dangte hian duhthlan tur dang nei hek lo - King Of North East nihna chanvo chu he basketball kaltlang hian Mizo kutah a hlan a nih kha... A hnu lawkah Delhi CM it ngawih ngawihtu Mizo te hi Delhi mipui aiawhtu an senior Mens Team chu Mizoramin a hneh zui zat a - hei hi tunhnai maia 71st National Championship neih zawh taka kan hniak hnutchhiah a ni, tun thil tihna a nih chu.

MSL chhehvel - Tribal rilru fîm lo zet hi a lang leh ṭhin. Mizo tih ve chi a ni lo ti tawk te, hnam dang ram hrana mi chah luh tih te, senso a hautak mai mai tih leh kan buaipui ang huin hlawkna a beitham tih vêl ri ring tak kha kan tlangvalten national championship lamah result ṭha hmangin an chhâng let miau sia - an thawm a reh deuh ta!

Rambuai lai khan Rev. PL. Lianzuala te kha zirlai mai an nih lai a ni nang a, an chipuite mangang leh nguia an awm phal lovin an chhiar tur, an nun chawm tur leh ṭangkai tur an buatsaih a, harsa takin an puitlin a. Rambuai laia Mizo mipui tam tak beiseina siam thar lehtu an nih tak kha.

Ni e, mahni chipuite nakin hun hisappui a, kan hnam hi a ṭha zawnga hmel­hriat kan nih theih nan Aizawl mihausaten MSL club din a, an sum hloh zozai chânna anga ngai lova Mizo ṭhalaite tân heti zat an thehchhuak ngam hi langsar vut lo mah se, kan hmuh hmaih lo! Anniho, club buaipuitute zawng zawng hi zahna chibai kan buk nawn leh e. Mahni ṭanghmahai invur lian ur ur te kan sawi lo - mihausa rilru hausate a ni kan thurchhuah. Anmahni i hre fuh lo palh ang e - MSL phenah biru takin an awm kuh tul a nia aw.

Hey, yoo! - MSL 7 zet chu a pui miah miah dawn teh e. Khawvela basketball league ropui ber leh sum tamna ber NBA lama khelh beiseina lo nei zuau zuau tawh - Ameri­can mi dum hleitling zuah mai an rawn inlan lehin Indian basketballer ṭha bikte pawh an rawn MSL leh dâwn. Anni hi boruak vawrh sangtu an ni phak kher ang em tih erawh zawhna chhan khirh tak a ni. Mizo tualchhung baller lian leh dawng zuah an rawn ther fur leh ang a, chungho kiangah chuan ball thiam rual tha za em em hmuh hmaih thiang lo an awm bawk ang.

Kum hnih zet MSL khelh a nih loh hnuah, National Championship lama hnuhma mawm tak hnut­chhiahtute phur vanglai leh Junior NBA kan ban zuau zuau tawh innangching chho mawlh hian chil a ti put a, kan va'n nghakhlel em! MSL boruak chhim ve ngei ang aw, R. Dengṭhuama hall-ah ngei le, ka ṭhian...

- Tpa Bunghai