NH 54 ngaihven a ṭul

Kan ram hi tlangram a ni a, kawngpui kan nei tam lo. Kan mamawh lakluhna ber NH 54 (Hunthar - Rangvamual) kawng a pin chuan kan buai ṭhin hle a, kan airport neih chhun Leng­pui Airport pawh harsa taka pan a ngai ṭhin.

NH 54 hi Hunthar Venga lei tlahniam ṭhin leh Rangvamuala leimin ṭhin avangin kal hleih theih lohin a awm fo a. Helai kawng a chhiat chuan ei leh bar thlengin kan buai ṭhin. Kum tin NH 54 ṭhat loh avangin kan buai a, chin fel a hun.

Hunthar leh Rangva­muala harsatna thleng ṭhin hi tu mawh mah a ni lo a, khuarel chhiat­na a ni. Politics thila inbeihna atana hman chi pawh a ni lo. Chutihrual erawh chuan harsatna kan tawh kum tin sutkian hna thawk tura mawh­phurhna nei erawh an awm.

NH 54-a kan harsat­na tawh fo ṭhin sukiang tur hian sorkar pawhin theihtawp a chhuah ṭhin chuan ka hria, mahse tun ai hian kan kawng pawimawh hi ngai pawi­mawh lehzual se chuan harsatna thleng ṭhin hi chin fel theih a ni ang.

Tun ṭhal chhung zawng­in Rangvamual leh Hunthara harsatna tawh ṭhinna hmuna harsatna kan tawh tawh lohna atana hmalakna lian tham hmuh tur a awm lo. Hunthar lei tlahniam ṭhin hi chu mithiam­ten zirchiangin, sorkar laipuia thuneitu lamah pawisa dil mek a nih thute kan lo hre ṭhin a, mahse hetia kan nghah ngawt chuan fur a lo thleng leh mai dawn a, kan buaina ngaiah kan buai nawn dawn a, chhiatna nasa zawk a thleng ang tih pawh a hlauhawm hle.

Kan state hi state intodelh lo kan ni, mah se sorkar hian a duhnaah chuan sum hman tur a nei ṭhin viau. Kan chakkhai lakluhna ber kawng hi sorkar hian tun ai hian ngai pawi­mawh se a duhawm hle. A nih loh chuan fur a lo thlen hunah ram pum buai­in kan buai leh dawn.

Ṭhal a zo hnai ta a, chuvangin chak zawkin sorkar hi a chet a ngai a ni. Sorkar laipui lama sum dil a hlawh­tling thei hrih lo a nih pawhin engti kawng emaw talin harsatna lian zawk thlen tur venna tur chu kan sorkar hian ngaihtuah se a duhawm hle. Hunthar leh Rangvamual kawng ngaihven lehzual a ṭul tluk zetin a helna lam pawh ngaihthah chi a ni lo.

A helna ber Kawn­pui to Lungdai kawng lah hian truck full load tan chuan kal a chakawm loh takzet a ni, chuvangin Sihhmui lam aṭanga a helna tur kawng siam tumte hi chak zawka siam theih nise. PTC peng lam pawh hi ṭha zawka black top leh mai ni se a duhawm hle.

Heng kawng pahnih hi kan siam a nih chuan Hunthar leh Rangvamual lamah harsatna thleng mah se kan buai lutuk tawh lo ang.

- Lalthansanga Hnamte