Dan loa kuhva lut dang tura ngaihten Dan anga CS lo lut dan an tum!

Central YMA hian an thil tum hi thlak leh se chu Mizo mipui lehkha­thiam leh thil awmzia hre chin tán chuan hnara hlir phawi ang huai a ni dâwn. Chuti ni lova CYMA kaihhruai NGO Coordination Committee hian kan Chief Secretary Renu Sharma hi 'Mizo a ni lo' tih avanga hnawh chhuah an tum a nih chuan Mizo hnam leh Mizoram hi India ramah hian mi hmusit ching 'racist' tiin min hre kumkhua tawh dâwn. Dan anga lo lut CS dan ai chuan dan lova kuhva lo lut Myanmar aṭanga smuggling lian tak lo dan hi tum zawk se, Kolasib leh Mamit District YMA member kuhva chingtute hi an läwm zawk dâwn si a.

Chief Secretary hi IAS zingah pawh a naran thlen theih a ni lova, hnathawk ṭha leh a senior chin chiahin an thlen theih a ni a, chuvangin 'Englova kan duh lova, ani aiah hian Englova zawk awm rawh se' tih ang mai mai a ni lo. CS chin hi chu a ni thei chin bîk an awm a, chu pawh chu a kawng hi thui tak a ni a, Mizo ṭawnga bîak theih CS ni phak hi a neih pawh kan nei em ni? tih te hi kan lo zir chiang hmasa lo em ni? CS hi duh leh duh loh chi pawh a ni lova, central sorkar lamah Ministry of Home Affairs lam chan a ni a, Aizawla hall pakhata inhmu khawmin lo rel ve mai mai chi a ni lo.

Renu Sharma hi lo nawr chhuak ta ngat ila chu MHA hian eng angin nge Mizoram hi min hmuh ang? Renu Sharma post ruaka lut thei Mizo IAS hi pakhat bâk kan nei lovin an sawi a, chu chu pension leh ta se "Mizo ṭawng thiam lo" tho tho hi kan neih a ngai dawn. A thu hrimin kan Chief Minister zahawm tâk, NDA pachal leh ama insawi dana India Hmar chhakah chuan NDA senior member pawh hian 'Mizo ṭawng thiam' Chief Secretary hi a sik chhuak zo lo kha a nia. Zep nak emaw a office lama amah puitu, Mizo IAS hi Chief Secretary atan a duh em em kha MHA chuan an ruat miau si lova, Renu Sharma hi min pe ta a ni. Chief Minister meuh, NDA lama BJP thawh puitu hian BJP hotupa leh Union Home Minister Amit Shah hi a hmin zo lova, NGO te hian office kai tur dan hian Mizo Chief Secretary thar hi dan chhuah theih an inring tehreng em ni le? NGO Coordination Committee bawk hian Republic Day Boycott tuma CAB pawh lo do tawh, a dawna chhan mumal tak awm si lova an ṭhulh leh te kha Mizo mipui hian kan la hria asin. Chuvangin Chief Secretary office kal tur dan tum pawh hi ṭhulh leh se a ṭha zawk ang.

Chief Secretary hi kan hmuh dân hian duh loh chhan tur a awm em ni? Hnam dang a ni sia Mizoram min hmangaih lova, a eiru nasa a, a duhsak zawngte a vulh a, sorkar a thawh pui ṭha duh lo. Mizoramah awm ṭha lovin Vairamah a kal chhen a, Mizo tán thawh pui hrehawm khawpin a induhin a inti lal em em tih a nih chuan lo dang pawh ni se a hriatthiam theih dan dan a awm.

Chutiang thil sawi tur awm si lova Mizo a nih loh vang hrim hrima a office kal tur lo dana Mizoram aṭanga chhuah tir kan tum a nih ngai chuan Mizoram tán mualphona a ni a, NGO lam pawh hian an member-te pawh rawn hmasa se. CYMA hruaitute pawh hian an member-te hi min rawn ve se, MZP pawh hian zirlaite lo rawn se; duh duha NGO hminga thu rum tak tak lo rel hi sim se a ṭha a ni.

Myanmar aṭanga kuhva tawlh ruk huaisen taka dang tura kan beiseite khan Aizawl pelha Sihhmuia kuhva danna gate siamah an lungawi theih tâk thut avang khan anmahni kan rinna a tlahniam a. 'Study Group' tih meuha dinin Kuhva chhiah tihniam tura state sorkar lama an thlen aṭang khan beisei a säng tawh lo.

Ram pawn aṭanga bungraw lakluh (import) thilah central sorkar bithliah sa tih hre chunga state sorkara kuhva chhiah (tax) tih tlem an dil a nih chuan 'game' an khel a nih a rinhlelhawm nghal bawk. Central sorkar kut a ni tih an hre lo tak tak a nih phei chuan Study Group lam hian lo study ngun leh se, Myanmar aṭanga kuhva smuggling kalpui dan hram ngaihtuah lovin a lut tur dan hram lam hi ngaihtuah zawk se a ṭha ang.

Kan CYMA hian Myanmar aṭanga Dan lova lo lut Kuhva hi Dan tum se, Dan ang thlapa Chief Secretary lo lut hi chu dan tum buai lo zawk se a ṭha ang.

- Lalmuanpuia