Tunlai chanchin...
Mizoram-Assam ramri buai kan neih khan an ngawi thei hle, hetiang issue hi chu 'na takin kan dem!' tih vel khan an tawp deuh tlangpui ṭhin. Mizo mipui aiawh tak meuh meuha kan en ber an ni a, ram leh hnam boruak inmung nasa lutukah an ngawi thei leh em em mai ṭhin si hi a mak tih chang a tam ta.
Myanmar aṭanga Kuhva rah Dan lo anga tawlh (smuggling) chung changah pawh 'Ram leh Hnam Humhalh' tura ngaih ber hi an ngawi leh tlat bawk. Anni hi kan thlir rawn deuh ṭhup a, an ngawi thei viau bawk si - sorkar lam lah an ngawi ve bawk, anni kan vauchher ber lah an ngawi deuh tlat bawk. A mak hi a tam ve phah ṭhin a nia.
Thawm an rawn neih leh ber lah chu Myanmar aṭanga Dan anga Kuhva rah lakluh lam a ni daih. Mamit District lama Kuhva chingtute pawh an mangang a nih kha. An tan a mangan thlak khawp ang, an Kuhva rah hralhna thlenga nghawng a ni si a.
Mizoram sorkarin zu zawrh phalna a titawp a, hun rei tak 'dry day' a puang a. Dan anga zu zawrh chu Mizoramah khap a ni zui - chuti ngawta kalpui theih ni hek lo, 'Rules' te siam a lo ngai lehzel a. MLP Rules zirchianna Committee vela Grape Wine duh lotu lian tak pakhat zingah an tel leh niin hriat a ni bawk. Kuthnathawktute Grape Wine an man sak laiin an ngawi tlat, an lo hlim ru viau nge kan hre lo. An thlavang an hauh tura kan ngaihte dodal zawng hian an che ta chat chat zawk a ang ta mah mah.
A chhan mumal tak sawi tur awm lovin, kan Chief Secretary hnathawk ṭha lai hle hle Pisa kai tur dang duhtu lian ber zingah an tel leh ta zel mai a! Tuna kan Chief Secretary neih lai, Dr. Renu Sharma hi fak hlawh deuh mai a la ni zui a, engvanga anni hian dodal ta chiam mai nge maw an nih tak ang le?
Chuanlam an siam zawng zawngte kha ngun taka enin Mizo mipui kan hmin mawlh si lo! Zuitu nei lo pawl kaihruaite pawh kan ang ta rum rum.
An hruaitu lawk hi sorkar hnuaia hlawh la deuh vek an la ni zui. Sorkar hnuaia hlawh la, sorkarin an 'service' chunga thuneihna a neih tlatte hi chu a tawp khawkah a buaithlak leh ta ṭhin a ni. North Korea Sorkar hnuaia lo in la pawr viaute pawh kan ang duh hmel zawk e a!
Tunlai thil awmzia a ni ve mai e.
- Zoa Tlau