KAN DUHTHLANNA

Television news channels hrang hrang han thlir ila ram ṭhenkhatah tui lianin in leh lo tam tak a tichhia in nunna an chan a. Kangmei chhuakin ramngaw leh ramsa a suat a, Leiminin in leh lo a hnawl a, Politics vangin buaina leh chhiatna te, inthatna hial te a thlen a. Sakhua vangin in hmuhsitna leh in endawngna a thleng a, hnam hnuai zawkten tihduhdahna an tuar a, naupang leh hmeichhiaten pawngsual rapthlak an tawk a ni. Chumi karah Covid19 a lo lang leh bawk a. 

News channels-ah politicians, activists leh mithiamte an in debate a, a au ring ring an dik emaw tih mai tur hi a ni a, thil hriatthiam a va han har tak em. 

Chanchin kan ngaihven ve zawng a nih phei chuan ngaihtuahna kan seng a, dik leh dik lo thliar thiam a harin ngaidan siam mai a awl ṭhin. Tin, ngaihtuahna dik lo leh thleibik neih a awl bawk. A chang chuan kan thil hriat leh kan hmuh te hian kan rilru a tihnualin kan beiseina te a ti bo hial ṭhin. 

Social media/ internet/ digital khawvelah kan cheng mek a, kan duh leh information te vawi khat lek phakah a awm. Kan duh duhna hmun aṭangin kan hai chhuak thei. Information hriatna ti zau thei tam tak awm mahse, ziak ṭhenkhatte hi chu min tithinrimtu, huatna, hmuhsitna leh endawngna rilru min put tirtu an ni thei. Mihring min tizau­thau a, tih vek chakna thinling min put tir thei video leh thlalak en sen lohin a awm bawk. 

Kan thil ngaihtuah, kan ngaihdan leh kan thlir dan te a inang lo. Kan duhzawng, kan hlimpui leh kan mamawh te pawh a inang hek lo. Engpawh nise mahni in thunun theihna leh chhia leh ṭha hriatna hman thiam a pawimawh ta ber a ni. Kan duh­thlanna te hian kan nunah nghawng nasa tak a nei thei. Mahni ṭheuh kan pawimawh ta ber e. 

Kan thil ngainat zawng, kan chhiar duh zawng leh thlir nuam kan tih zawng te hi i thlang thiam fimkhur ang u. Kan duhthlanna a pawimawh a nia. 

Kan duhthlanna hmang thiamin ṭhian ṭha leh midang rilru ngaihtuahna dik lama hmang thiam bulah awm tam ila. Chanchin ṭha leh lawmawm ngaithla tam bawk ila. Kan tana ṭha tur ngaihtuahtute bulah awm tam a pawimawh. 

Pathian min pek finna, hriatthiam theihna, a dik zawng leh Pathian lawm zawngin hman ṭangkai i tum ṭheuh ang u.