MANGTHA LE DIEGO...

Kum 2020 zet chuan mi ropui a va liampui hnem em! Kristian Apologetics ropui Ravi Zacharias-a aṭangin hei tunah footballer legend Maradona chu India sanaa nilai zan (Nov 25) khan lung lam ṭha lo avangin a liam ve leh ta. Khawvel mihring piang tawh zinga mi tam takin football thiam bera an ngaih Maradona hi a thih hian kum 60 mi a ni. 

Maradona vanglai hi keini ang chuan kan hmu pha ve lutuk lo va, a hming erawh hi chu vawiin thlengin kan byheart hneh ve khawp. Kum 1990 world cup kha kan en ve hman a, Italy  rama nghah a ni nghe nghe, khami ṭum World cup theme song (to be number one) kha vawiin thlengin a tluka mawi tih ka la nei lo hial. Rome khawpuia Stadio Olimpico khelmualah entu mipui 73,603 hmaah July ni 8-ah final khelh a ni a, khatih lai khan kan vengah TV nei pahnih emaw chauh an la awm a, antenna her chawp ngai kha a la ni zui a, ka la hre reng mai. Argentina leh West Germany ten final an khel dawn a, keini naupang thleng khan kan phûr khawp a. Zan an inkhelh hma darkar khat velah kha chuan kan venga TV nei awmchhun te in kha a khat deuh vek titih tawh! 

Keini naupangho kha a hma berah TV bul hnaih set sawtah puitlingho khan min remkhawm a, inchhûng kan khat mai a ni lo va, verandah thleng khan kan awm ta hialin ka hria! Maradona che vel kha hmuh kan châk ber a ni pakhat bawk a, Germany lam tan pâwl kha chu kan ti thei lo viau!

World Cup hmasa kum 1986-ah Argentina hi an lo champion tawh a, chumi ṭum chuan Maradona hi ropui takin a che a ni awm e, tun hnuah youtube te a lo awm hnu hian Maradona kha a lo ropui hle tih kan han hre tlai khawhnu ve a! '90 world Cup ṭum pawh khan Maradona chu la vanglai tak a ni, mahse an vanduaia final-ah an chak zo ta lo va, Maradona mittui tla leh a ṭap pawh kha ka mitthlaah a la châm reng mai. Khatih lai te kha chuan world cup final-a chak loh kha eng ang taka na nge a nih ang tih pawh kan hrethiam phak chuang lo! Chutah zing dar 2/3 velah final a zo a, lane chung kawt zawlah football kan han pet zui a, world cup en zo hlim tih takah thiam ta bik riau te khan kan han inhre ṭhin kha a ni a... a ngaihawm ta mang e! 

Maradona chanchin te, a lawmman lak, leh football-a a sulhnu hnutchhiah ropui tak takte hi chu keini aia hre zawk an tam avangin sawi ve vak lo ila, khawvel hi chuan a ngaisang a, football khawvelah chuan 'mi ropui' a ni kumkhua tawh ang. Kum 1994 World Cup-ah a rawn inlan leh a, mahse game 2 chauh a khel hman a, hemi hnu hian world cup-ah a hmel kan hmu ta lo. Amah ngaisangtuten a hminga kohhran hial an din te hian an ngaihsanzia a tilang chiang hle awm e. Football a chawlhsan hnuah eng eng emawah a hmingchhe ve zauh zauh a, chuta ṭangin a rawn insiamṭha chho leh a, nunphung pangngai takin a rawn indin chho a, Argentinal national coach ah te hial a rawn ṭang chho leh a. A hun hnuhnung lamah taksa bawrhsawmna in a tlakbuak ve ta deuh reng a, tichuan Nilaini (Nov 25) India sana-a zan lamah khan cardiac arrest avangin khawvel a lo chhuahsan ve ta a ni. 

Footballer ropuiten an uina thu an chhakchhuak nghal a. Lionel Messi chuan, "Diego Maradona chu a thi a ni mai thei a, mahse chatuanin a nung reng ang, amah nena kan hun hman dun te kha engtikah mah a thi ve ngai lovang" a ti. Brazilian legend Pele-a chuan a ṭhian ṭha ber pakhat a chân tih a sawi a, Cristiano Ronaldo chuan Maradona chu 'uparallel magician' (tehkhin rual loh khawpa thiam) tiin a sawi. Manchester United chuan an offcial page-ah "Football-in a icon ropui ber a chân ta" tiin an ui thu an post bawk. Khawvel mi lar leh ropuiten an ui thu an sawi chhuak nasa hle. Pele aṭanga Rahul Gandhi leh bollywood filmstar thlengin, chutah Mizo footballer leh tualchhung mi naran thlengin kan ui thu kan sawi chhuak hlawm a nih hi, football hi chuan khawvel ram, hnam leh chi hrang hrangte pawh min lo phuarkhawm thei teh e!

Football mi ropui chu a liam ta, a sulhnu hnut­chhiahte erawh chu khaw­vel awm chhung daih turin lungphêkah ziak a ni a, theihnghilh a ni tawh lo vang. Keini hian kan thlanlunga ziah tlak thil tha hnutchhiah kan nei ve ang em le? 

"The Hand of God is now in the hands of God!"