MLA nih i tum a nih chuan...

Nakum mai khi vote thlak hun a lo ni leh ta. Thla 20 velin min la daidan a nih chu.

Thingtlang leh khawpui lamah bial vil, bial melh MLA nih tum, mi retheite hmangaih thar an inlar hun vanglai tak a ni leh tawh a. Nakum 2018-ah meuh chuan a niawm chu a riruat theih kuarh tawh si ang. Chuvangin, rorellai party leh eptu lam party a bikin, Congress leh MNF chhungah bial inchuhna, ‘thing leh mau innawh hun’ a thleng na viau ni te’n an sawi a. MLA nih tum te tan heng point 10-te hi ka’n chah ve ang e.

1. Hamṭhatna leh intih larna ṭhutphaha ṭhutna tur a ni lo tih hria la. Dan siamtu, legislator nihna hi MLA nihna laimu a nih vang zawkin pawng zuam suh.

2. Sum i neih hmangin sual chhuah tum mai lo la. Sumin a lei theih loh mihring rilru nghet leh dikna duhtu an pung hle tawh tih theihnghilh suh.

3. Tuna chhiat tawh thila i insenso vena ngawt kha, tuma phût vang che a ni hran lo. MLA-a din tum niawm taka i inlan ṭhin vang zawkin i hming an lam mai a ni. MLA nih huna rulh leh theihna kawng awm dawna i hria a nih phei chuan, chuh lo zawk teh - chu chu kan ram hmelma a ni e.

4. Sum hmatheha GSA, MHIP, YMA leh pawl dang te thil tih reng rengah khuallian ni tura i intah luh/ barh luh chiah khan mipui pawi i sawi daih tawh. Pawisa chhete te i phawrh ṭhin vangin mipui thinlung lei telah in ngai hek suh, mi dik leh thil ṭha duh mi i ni lo tih a lang reng tawh zawk a ni.

5. Mahnia tling leh ṭha tawka i inngaihna chiah kha chapona a ni. Mi te’n engtin nge an sawi ṭhin che tih ngaihtuah tel ang che.

6. Mi, tute emaw fuih­pawrha inkoh tir ang chi te phei chu sim daih rawh. I ṭha a nih ngang chuan an ko em em ang che, hmanhmawh lo la.

7. Inphahhnuaina leh thuhnuairawlhna hian thil a ti thei tih hre nawn la. MLA ni tur bik hi, tu nu mahin a hranin an hring lo a, i theihna leh thiamna tipung zawngin ke pen la. Chu chuan ngaizawngtu a hmu awlsam ber.

8. MLA candidate niin, i tla fo tawh a nih phei chuan inenlet i ngai hle tih chhut fo rawh. I tlak fo chhanah puh tur zawng loin, i mawh liau liau a ni tih pawm la. Bial mipuite mitmei en la, iai viau chung chea an thlir dan emaw lainatna hmel an mitah thliar hrang thiam ang che; chuti lo chu a hma pawh i phak lo ang.

9. MLA nihna hi a zahawm a, mahni inhaivurna leh, inlak engemawna a ni lo tih hre nawn la. Mipui kutthlakna ngeia thlan tlin MLA-te hian an hlawh chhuah chu ‘hnathawh kawr’ a ni. Ram mipuite tana him leh ṭha tur hmasawnna an neih theih nana ‘dan zamtu pawl’ an nih vang lam zawkin, he hna hi hna zahawm a nihna a zual em em. Chuta i ṭangkai dawn lo a nih phei chuan MLA nih tum duh ting suh. ‘Ka ti laklawh tawh,’ tih mai vangin kawhmawh bawl chhuah lo la, chuti lo chu mi te’n an hlat hret hret ang che.

10. Lehkha zir sanna leh hniamna, upatna leh naupanna kawngah MLA nihna hi a innghat ngawt lo; mi rintlak nihna lam zawkah a innghat ber. Chuvangin, nungchang a pawimawh a, dikna leh felna, remhriatna leh taimakna tel lo chuan thui a kal theih loh va, nundan ṭha leh invawnna felfai nei lo te chu a tawpah an inchhuihbah fo reng a ni. Pawng zuam ngawt lo ang che, sim ta daih pawh sawi tur an tam em hi.

- Lalruatzuala (Zuazuala)