Mirethei zawk harsatna kan siam em?
Mi pangngai, tu pawh hmasawn leh nawm sak leh hausak duh lo kan awm lo, kan theih ang tawk tawkin hma kan sawn theih nan kan bei ṭheuh va. A ṭhen chuan an ram an hralh ṭhen a, chu chuan in an sa a. Ṭhenkhatin loan an la a, sorkar hnathawkten an hlawh aṭanga rulh leh turin HBA te an la a, an GPF te an la a. A bik takin Aizawlah phei chuan in chhete khawr pum tur pawhin sum tam tak sen a ngai a, neihthinglung khawngin chenna in nuam zawk, rinawm zawk neih tumin ṭan kan la ṭhin.
Chutih laiin AMC lamah phalna lak a ngai a. Ṭhenkhat mahni hma sial leh duham lutuk vangin vantlang kawng leh ṭhenawmte ram dip khawpa hma la duh an awm a. Hetiangten an duh ang anga thil an tih loh nan sorkar (AMC) emaw Local Council hruaituten hma an la a, an en pui a ṭha a, a ṭul bawk.
Chutih mek laiin, a sir lehlam han thlir leh ila. Miin, harsa tak chungin in an sa/ extend dawn a. Anmahni ram chhungah ngei, an phak tawk leh an sum neih ang milin inren theih tawpin hma an la ve a. Vantlang kawng leh ṭhenawmte pawh an nek buai lova, chuti chung chuan AMC lam hian phalna pe dawn se Architech ruai a, drawing te siam tir turin an lo ti tlat zel a. Architech rawih man (drawing man) hi cheng sing hnih/ sing thum lai te a lo ni a, ṭul loa sum senna ang deuh a nih avangin hei hi a hautak lutuk a ni.
Mihausa chuan an duh leh architech te chu ruai ang hmiang. Mahse Architech ruai kher lo pawhin Mizo pa pagngai chuan an sum neih dan milin rinawm ve tawkin in chu an sa ve thei. Mistiri fel tak tak pawh man lovin an rawn thei. Engamah hma a, an duh emaw duh lo emaw pawh sawi lova Architech rawih kher ngai tura dan siam hi mi harsa zawkte rahbehna leh mi tana harsatna siamtu dik tak niin a lang.
Miin sum leh hun tam tak sengin Architech an zir chhuak a, a ruai duhtuten an ruai ang a, an duh zat zat inchhlar pawh ni se thik tur a ni lo; an thiam man a ni ve mai.
Amaherawhchu, mi harsa zawkte architech rawih tir ve kher hi a ṭul lo. Miretheite tana khirh tak taka dan zam hi a ṭha lo. Pathlan thikthu chhiatna pawh miretheite hnehchhlah hi a ni. Lirthei pawh mihausate ang bawkin mirethei pawhin a mamawh a, a thar lei thei loin a hlui an lei mai a. Thik tur leh huphurh tur an ni lo.
Tin, lirthei neituten Road Tax an chawi ṭhin. Chu an Road Tax chawina khawngah chuan minute khat/ hnih lek han ding sela parking fee an chawi nghal zel mai! Chhiah kan pek tawhna hmunah ngei reilote han din lawk pawhin chhiah pek ngai zel zawnga dan siamte hi mipui harsatna siamna dik tak a ni lo maw? Parking hmun tura ruahmanah chuan Parking Fee pek erawh chu tih makmawh a ni.
Mipuite hamṭhatna leh awlsamna tur zawnga hma lak hi sorkar ṭha tih ṭhin dan tur chu ni awm tak a ni si a.
- Zoramngaia, Aizawl