Office ṭan hun vawn dik theih loh hi a zahthlak
Office hunlaia pawn lama chhuah leh chhiat ni ṭhat ni lama chhuahte phei hi chu Mizorama sorkar hnathawk hian ‘âwm ve rengah’ an ngai tawh a, inkhap theih a nih hmel lo. Hei hi kan titawp thei lo a nih pawhin, office kal hun an vawng dik thei lo hi chu thil chin fel theih niin a lang a, hotu lam aṭanga tih tak taka nawr chuan a hun taka office ṭan hi chu thil tih theih a ni.
Mawl takin han sawi ve ta ila, office ṭan hun hi dar 9:00 a nih chuan, Aizawlah hian dar 10:00 velah traffic a jam nasa ṭhin. Office kal nawlpui hi an tlai vek tihna a ni ber mai. Ṭan huna thleng chat hi chu sawi tur an awm ngai meuh lo.
Tlemlai deuha sorkarin office kal hun vawng dik tura thupek a chhuah khan, sorkar hnathawkte khan office kha a hun takah an kal nge kal lo tiin journalist ṭhenkhatin office an fang a. Office-ah pawh a penhlelh lam ni lo Mizorama sorkar office pawimawh ber ber, New Secretariat Complex-a mi an fang a, a hun taka office thleng an tlem hle. Hei hian kan office inkaihhruaina a dulzia a tilang chiang a ni.
Keia han sawi tum ve tak chu kan Chief Secretary hian tlawmah lak nachang hria se, a hnuaia sorkar office staff-te’n hun an vawng dik thei lo hi ama thiam loh a ni. Tun hma aṭanga min hrilh dan chuan Chief Secretary leh Secretary rual hi chuan a hun takah office an thleng a, a ṭhen chu a hun hmaah thlengin office ban hnu thlengin an thawk
ṭhin a, an thawkrimin an taima tlang hle. Nimahsela an hnuaia mite an inthlahdah thei tlat mai hi chu inawp dan fel lo tak a ni.
Chief Secretary-in pisa kai hun a vawng dik thei a nih chuan, a hnuaia Secretary zawng zawng khauh takin hun vawng dik turin a hrilh tur a ni. Anni hian Additional Secretary, Joint Secretary... Under Secretary thlengin an in hrilh zel ang. Tichuan, Assistant lamah, UDC, LDC leh Peon thlengin an inhrilh chhawng zel ang. Hetia ziah mai hi chu a awlsam a, a taka tih chu a harsa tih a lang a; nimahsela kan ti ṭalh ang a, ‘tum tak takna’ a awm chuan helaia sorkar hnathawk tlem te hi chu an invawng fel thei tur a ni.
Biak Ina ṭan hun vawng dik thei Mizote hian sikulah pawh ṭan hun takah kan fate kan luh kim tir ṭhap thei a, chuvangin sorkar office a nih tak avanga ṭan hun vawn dik theih loh hi chu a dik lo takzet a ni. Heti zawng pawh hian ngaihtuah ta ila, sikul naupangte zawk zingah an ṭan hmatir thei a, a tihtirtu School Education Department Directorate leh an hnuaia office-te tal hi a hunah an ṭan em?
Police officer pisa ṭan hnua traffic jam-a la tang mai mai hi in lo hmu ve ṭhin em? Kan Police-te meuh pawhin hun an han vawng dik ta lo hi chu a inenkawlna lam fel loh vang a ni ber e. Office chhung discipline, work culture leh thil dang sawsi hma hian, a ṭan hun tal hi chu vawng dik hmasa ila, a dang hi chu kan la sawi thei chauh ang.
Sorkar hnathawk office ṭan hun vawng dik thei lo awm khawmnaa sorkar hnathawk hotu lian nihte hi zahthlakah ngai se, Biak Ina hun vawng dika mahni eizawnna hmuna tlai reng mai nihte hi mualphonaah ngai ila. Office kal hun kan vawn dik hunah thil ṭha dang hi chu kan sawi ngam chauh ang.
- Tetea