Pa tih tur leh mawhphurhna

Chhungkaw dintu chu Pa a ni a, chhung­kaw hmasawn leh sawn loh te, hmingṭhat leh chhiat zawng zawngah te pain mawh a phur fai vek a ni. Khawvel thil mai ni lo thlarau nun - van ram kai leh kai loh thleng hian pa mawhphurhna a ni. Chuvangin, chhung­kuaa pa mawh­phurhna hi sawi uar lutuk a awm thei lovang. A hnuaia thupui hrang hrang hmang hian pa tih tur leh mawhphurhna ṭhenkhat te i lo zir ho ang u.

Pa chu chhungkaw lal a ni: In chhungkuaah pa chu lal a ni em tih lo inbih chiang teh ule! Pa a lal loh rual chuan tunge rorel ta ang le? Chhungkua hian roreltu kan mamawh em em laia roreltu kan neih loh chuan a buaithlak hle dawn a ni. Chuvangin, pa chu nupui fanauten lal a ni tih hriain an zahin an hmangaih tur a ni. Hetih lai mek hian pa chu a rui mai mai thiang lova, chhungkua chu a lerh san mai mai thiang bawk lo. A fun kim zawngin a lal ram tan a chhun azanin a ngaihtuahin a thawk tur a ni.

Pa chu venghimtu a ni: Chhungkaw lalram venghimtu chu chhungkaw lal bawk pa kha a ni a. Chhungkaw tichhe zawng leh timualpho zawngin a che thiang lo a ni. Misual lakah te, harsatna lakah te chhungkaw himna turin chawl lovin a bei reng tur a ni.

Pawn lam aṭanga harsatna mai bakah chhung lam aṭang chhungkaw chhiatna thlen thei nupui fanau nungchang ṭha tawk lo pawh thununin chhungkua a venghim tur a ni.

Pa chu puithiam a ni: Pa puithiamna hi a pawimawh hle. Pain Pathian a pawl a, Pathian thu anga chhungkua a kaihhruai loh chuan chhungkua chu a ral mek a ni. Chu­vangin pa chu, Pathian pawlna dal thei ruih­na­ah te, dawtah te a insumin a fimkhur em em tur a ni. Ramhuai te hi kan ramah an tam tak em avangin pa chuan puithiam a nihna hmang ṭangkaiin theih tawp a chhuah a ngai.

Sawi tur chu a awm ṭeuh ang, mah se he thil pathum hi pain a zawm ṭhat phawt chuan chhungkua chu malsawmin a awm ngei ngei ang.

- C.Lalngura, Vengthar, Champhai