TUNLAI TITI HI

Tunlaia Mizote titi lar ber chu, inkhel thiam Danmawia chung chang leh Miss Mizoram thlana bikini round chung chang hi a ni awm e. Nakin lawka kan titi lar ber tur erawh, politic a nih a rinawm!

Social media hrang hrang leh ṭhianhoa kan sawi tam ber pawh, Danmawia leh Bikini round chung chang hi a ni ngei ang. Zu zawrh ang bawkin inhnialna a titam kher mai.

Ri hluai hnam

Mizote hi ri hluai hnam kan nih hi, tih mai turin engemaw hlekah kan ri hluai a, kan daih rei leh lem hlei lo va. A tira thih ngam khawpa kan lungawi lohna pawh hi rei lovah kan theihnghilh leh a, lungawi takin kan awm leh mai ṭhin. Engemaw zawng taka thlir chuan, a

ṭhain a lawmawm phian mai. Amaherawh chu, kan politician-te hian kan lungawi leh thuai ṭhin a ni tih hriain min ngaipawimawh tawk lo niin a lang tlat. Chuvang chuan lungàwi zung zung loh pawh hi a ṭha zawk hial maithei.

Hman deuh khan, veng pakhata nula pakhat chuan a rukin thla a la a, kekawrte leh hnute hrenna chauh inbelin. Chu thlalak chu tu te’n emaw an theh darh a. A awmna veng MHIP phei chuan a chenna aṭangin an hnawtchhuak hial a nih kha! Kha nu kha a vanduai ngawt mai. Tun dinhmun hi chu ni se, sawi pawh kan sawi zui peih kher lo maithei. Mi ṭhenkhat phei chuan kan nuihzat zawk hial maithei asin!

Ni e, tunah hian kha nu aia inbel thelem leh inbel pawh nei miah lova thlala kan Mizo hmeichhe zingah hian an tam kawp mai. Mi ṭhenkhatte phei chuan sex video hial an siam. MHIP tan pawha hnawhchhuah sen loh an ni a ni mahna, an hnawhchhuah thu reng reng hriat tur a awm tak loh hi. Nge, an lo hmu ve reng reng lo zawk!

Tunah Miss Mizoram thlannaah Bikini round siamin, kan nula sawm rual chuan hnute khuhna leh kekawrte chauh inbelin lui kamah thla an la teu teu mai le. An va nalh tehlul em! Hnam dang nula kan ngai ta bik lo; kan nulate pian nalhzia leh an tisa mawizia te, an ngo nalh ve tawhzia hi - Pathian thil siam zinga mawi ber chu an lo ni e! Mi ṭhenkhatin nalh leh mawi kan tih em em pawh hi, ṭhenkhat tan chuan tenawm leh ngeiawm a lo ni ve thei tlat si a. Mipui kan thuhmun thei lo fo chu a nih hi.

Khatia kan nula ten an taksa mawina zawng zawng an pho chhuah kha, a seltute chuan, “Kristianna nen a inrem lo. Mizo khawtlang nunin a la pha lo. Mi dang fuihpawrhna leh anmahni ngei pawh tihzahawm lohna a ni,” tih zawngin an thluk a, Miss thlan buatsaihtute nen lam kan thiam loh ta phiar mai.

Khati ang kha Kristianna nen a inrem lo kan ti dawn a nih chuan, kan Bible-a ‘Hlathlankhawmte’ hi pawtthla daih ang u hmiang - a ṭawngkam hi a sexy mah mah deuh a ni!

Kan khawtlang nunin a la pha ve lo, kan ti maw? Top-up man chauh hlawh tur pawha kan nula tam takin saruaka thlalak an pawisak tawh loh lai a, kan khawtlang nunin a pha hrih lo tih reng hi zawng ka pawm loh zawng tak a ni.

Thil dang zawng zawnga khawvel rual kan el nasat viau tawh laia, kan nula nalh tak takin rual an el ve tur hi kan phal lo tihna em ni? He round tel lo hi chuan khawi hmunah pawh eng chen mah an thleng thei lo a ni tih hriatpui ve a hun ta khawp zawk mai. Kan khaw tuala kan inzir thiam a, kan inzir fin phawt loh te chuan rual kan khum thei nang le.

Lo hmu sirhê nghal ringawt lo i la, thil sual ti taah lo ngai ngawt lo ang u. Kan nula chhelo tak tak hian an taksa nalh tak hi hlawh mumal nei lova an mualphopui leh ringawt ai chuan, heti anga zahawm taka an inpho chhuah hi i phalsak mai teh ang u. An tui zawng tak thil, mumal taka kan buatsaihsak mai hi a finthlak a ni. Chuti a nih loh chuan, mualpho takin an inpho chhuak tho tho dawnin a lang.

Amaherawh chu, an zahawmna kan humhim sak a, ṭha taka kan inzirtir erawh a ṭul. Kan nulate pawh lepchiah phah lovin zahawm takin awm zui tum tlat se. Therhlo eng-i-lo mai mai vangin an taksa mawinate hi pho lang mai mai lo se a ṭha khawp mai.

Tin, heti anga Miss thlannaah hian heti ang round hi siam a nih loh chuan, an taksa mawina tak tak a hriat theih loh mai ni lovin, mi ṭhenkhat chuan a rukin an taksa tihlan mawina tur eng emaw an lo inbel ru ṭhin a ni awm e. A buatsaihtute lo dem ngawt chi pawh a ni chiah lo.

MHIP-in an duh lo hle a ni awm a, thuchhuahte hial siamin Zonet lam pawh TV-a tichhuak tawh lo tur leh a video te hial thai reh turin an duh ni awmin an sawi a. Hmeichhe rual tih takah hmeichhia an nihna a lang hle niin ka hria! An pasalten chilthli tla duah khawpin an lo thlir a, an thik lutuk vang nge, an fanute heti anga an inpho chhuak mai hi an hrethiam lo zawk ni.

Nute u, in fanu tam tak chuan a rukin ruaka thla lain in hmuh ve loh lam social media-ah hian an darh chei chuai asin. Nangniin phal lovin duh lo eng ang mah ula, khawvel ṭhang zelin a ṭhanlenpui a ni miau a, ti lo thei lo niin an inngai tlat em maw tih mai tur an ni tho tho tawh. Chuvang chuan zahawm taka an inpho chhuah hi zahawm takin phalsak ve zawk mai teh u.

Miss Mizoram 2017 thlan chungchanga han sawi belh tel lawk ka duh chu, talented round-a kan nulate khawsak dan kha a nuihzatthlak lek lek ka ti! Talent dang pho chhuah tur hre ngang lo kha an rawn zai ni maiin ka lo hmu deuh a. Chuta karah Mizo hla pawh sa lova hnamdang hla rawn sa ta daih maite an awm lehnghal - Miss Mizoram thlan ni na na na!

Ka zak ta ngai lo

Kan tleirawl chhuah hlim khan (han ti ve ngial ila), sapṭawng hi a hlauhin kan hlau deuh a ni ber mai. Mi zingahte hian kan lam ri ve ngai mang lo - kan lam sual anga min nuih ang tih kan hlauh vangin.

Keini ang sikul chhe chhuak phei chuan kan zirlaibua sapṭawng thumal lo awm hlek tawh kha chu kan chhiar ri ngam meuh lo. Innuihzat kha kan ching em lah tak a. Thiam bik uk lo chung khan midang lam sual chu kan hre thei fu a, kan la nuihsawh ve khanglang ta dah a. A va changkan loh thlak tak.

Khati ang mi kha kan nih miau avangin tun thleng hian sapṭawng kan la ṭih ru deuh tlat a. Kei phei chuan ka lam dik hleithei lo. Ka hriat ve ang chhun chhun pawh hi ka bahlah viau tho mai. Mahse, ka zak ta lo!

Ni e, ka lam sual nawk nawk fo a; min nuih tawk pawh an la awm; mahse, ka zak ta ngai lo. A chhan chu kan hnam ṭawng a ni lo va, tihdik vek ka ba lo. Thiam lo pawh ni ila ka zah nachhan tur ka hre lo - ka pianpui ṭawng pawh a ni hleinem. Tin, mahni hnam ṭawng pawh ziak kim thiam lo te mah an zah lohte chuan, hnam dang ṭawng ka thiam loh hi zahna tham tlingah ka ngai lo.

Mahni hnam ṭawng aia hnam dang ṭawng thiam zawk nihte hi intihtheihna tlak a ni lem lo. Zahna awm zawk a ni. Tu mahin an ngaisang tak tak lo. Hnam changkang apiangin mahni hnam

ṭawng hlut leh humhalh nachang an hre lehnghal. Chutih lai kara mahni pianpui ṭawng pawh thiam ṭhaṭhum lovina sapṭawng thiam lo ka nuih e, lo tih te chu a sap ram kal loh thlak lutuk.

Hetia ka sawi avang hian, sapṭawng hi thiam a ngai lo ka tihna a ni lo. Kan thei a nih phawt chuan ṭawng dang pawh thiam belh zel tur. Mahse, kan hnam ṭawng theihnghilh phah khawp emaw ngaihnep phah nan emaw ni lovin, kan hnam ṭawng chawikan nan ni zawk rawh se. Tin, a thiam lo zawkte nuihzat tel kher hi a changkang lo.

Mahni hnam ṭawng hman dik thiam loh leh ziah kim peih loh hi changkanna changkang lo ber pawl a ni tih hre thar leh teh ang u. Hei hi MHIP inrawlhna tur awm zawk tak a ni.

Heng mi ten kei sapṭawng thiam lo hi min nuihzat chang hian, ka zak ta lo - ka nuih an tiza letling zaw mah!

- Rindika Mizo, Chawlhhmun Ropaiabawk