KEKAWR MAWNG PAWP BEL!
Kum 2001 a pawl sarih ka zir lai kha, ka ngaihtuah lêt leh hian a hahthlak ka tiin ka nuih a za a, ka zak nawn fo ṭhin!
Chhungte’n pawl nga kan zir lai aṭangin, hmalam hun hisap ran in uniform kha lian hek hawk, pawl 7 kan nih thenga daih tur min ṭhui sak a, hmalam hun an thlîr thiam vang ni loin retheihna vang zawkin uniform kum thum daih tur min leisak a nih chu!
Naupang nungchang ṭha leh ṭuan fum tak ni lo ta nafam chuan kan uniform chu kan tâl chulin kan ha phuai hle a. A mawng leh a khûp te chu a bel tlul ta mai! Chuti ang chuan kum 3 kan han ha, kum thumna, pawl 7 ka zir kumah chuan a mawng chu a ṭet ta tlat mai! Pawl 5 ah khan ka star ruk deuh mai a awm leh nghal a, ka rilru a va hah em!
Ka chhungte hnen aṭangin form kekawr thar chu beisei chi a ni lo a, engtin nge ni ang? Ka pa ka hrilh a, a ṭhuina lang thei lo tur berin min han ṭhui sak na a, a ṭhuina a lang tho tho - ka kamis-in a khuh pah si lo a! Sikul kal ka hreh ta hle mai! Engtin nge ka tih ang tiin ka in ngaihtuah a, ka hrechhuak ta!
Kawrlum hma pum, mawng khuh pha ka nei a, chu chu nitin ka ha ta ṭhin a, ka kekawr mawng pawp chu a khuh thei a, ka lawm hle.
Mahse khua a lo vawt reng lo a, nipui a lo ni chho a, kawr lum chu hak reng theih a ni ta lo a, ka buai ru hle. Chutih lai chuan tactic thar ka hre leh ta - kawrlum chu ha loin ka kawngah ka suih a, ka mawng lamah ka bang liam ta a. Chuti chuan nitin kawr lum kawnga suihin sikul ka kal ta ṭhin a, ka star rûk reuh reuh hnenah pawh ngampa takin ka kal ve leh thei ta - kawrlum veng chungin!
Mi hi an lo ã reng lo a. Chutia kawrlum ka veng reng mai chu a chhan a awm ringtu kan class-ah chuan an awm tla tlat a, room chhunga ka kawrlum ka ven loh châng zauh chuan ka kekawr mawng chu a pawp an bel a ni tih an lo hmu ru ta fur mai! Kan Hindi teacher lah chuan intlar laiin hlip turin min ti mauh bawk a, ka harsatna kha a va han hrethiam lo tak!
Ka kekawr chuan pawl 7 board exam hun thleng chu min daih dawn ta lo a, tihngaihna a awm tawh si lo, Lunglei lama kan chhungte min pêk kekawr pawl chu ka ha ta tawp a, kan Head’ Pu Rina hnenah in report-in min ngaidam a nih kha - ka va lawm em!
Zirtirtute u, in naupangte hi an uniform a ṭha em, an sikul shoe a ṭha em, note ziahna tur ziaklohbu leina tur an nei em tih te hi han ngaihven leh zual ula, zirtirtu ropui, malsawmna thlentu, missionary ropui in va ni lehzual dawn em!
- Rinfela Zadeng