IN THILTIH THATE KAN HMU CHAK ASIN

Rual kan awt ve tawh a nih hi. Ringlo mite thil tih ṭha kan hmu in kan hre ve fo si, nangni pawhin in tum chuan in ti thei em em ang.

Khu lamah chuan: Delhi Chief Minister chauh emaw kan fak dawn kan ti a, mi dang an rawn lang leh tawh.

Delhi Chief Minister chuan an thil tih ṭhat, vote zawn nan an hmang piap piap mai. Delhi khawpui tana Damdawiin ṭha tam tak hawn belh leh electric bill leh tui bill mi rethei tana free te, school ṭha an dinte chu an chhuang larh mai a. Officer dik lo an man chhuah dan te, mipui hmuh laia an hauh piap piap ngam dan te, Delhi khawpui a kawng chhawng an siamte chu, estimate aia tlema an siam zawh theih dan te, an hospital thar sak lai, PWD minister-in a tlawh a, a vilpui dan hmuhnawm lutuk te chu, social media-ah an chhuah uai uai mai.

An thil tih ṭhat chu hma­chhuanin, Panjab inthlan­ah an champion pui nghal a. Panjab Chief Minister chu eng teh ruai a ang ve awm si lo tia kan lo ral thlir ve ngawt laiin, thawm ngaihnawm zet mai media hmaah a rawn thut chhuahpui ve leh ta.

An Health Minister Vijai Singla chuan a department a hna thawkte hnenah, 1% zel a lo lak thu report a dawng a, Health Minister hnenah an hekna chu a dik leh dik loh a zawt a, a pha ngam si lo va, a ban nghal hmak mai, police-in an la man zui. CM chuan "Duh ni ila he thil hi ka puanhnuai thei lutuk. Mahse, chutianga ka tih chuan ka chunga rinna nghattu mipuite min rinna a tikeh chhe vek dawn tih ka hria... eirukna hi cheng khat pawh nise ka ngaizam mai mai dawn lo" a ti e an tih chu.

Khu lam khu chu an thawm a ngaihnawm bik asin. Thil tih ṭha chhuan tur an nei bik tlat alawm.

Keini lam thung chu: Panjab Chief Minister Bhag­want Mann-in depart­ment hna thawhna 1% laksak vanga Health Minister a ban duh laiin, keini chuan hmanah khan 3% party-in kan laksak thu, timna awm miah lovin kan sawi chhuak ngam kha a ni a. Khu lamin eirukna nia an ngaih kha, keini tan chuan eirukna a kawk ve tlat lo.

Education siam ṭhat nan tiin, mi sum pukin school building kan chei ṭha e kan ti a, hna thawktuten Minister chak tak tia kan chhuan lai ngei pawh, a hmel an tichhe zui a, a tichhetute chu party mi bawk niin an sawi - kan infak hman thlawt lo chu a ni. Education siam ṭhat chu a la hla deuh deuh.

Delhi CM-in an kawng chhawng siam dan chhuang taka a aupui laiin, keini Airport kawng chhawng siam lah chu a chim dur mai bawk si a, a siamtu lah kan sawisel nuai nuai mai bawk si - khua hi a la var lo deuh chu a ni.

Hman deuh khan MLA ten an fund dawn an hman dan, social media lamah an rawn pho chhuak zauh zauh a, thil lian tham ni lo mah se a hmuhnawm ve khawp mai. Hna hi dik taka thawh chuan, a lo thawh tam theihzia kan lo hmu ve a.

Mahse kan lo hmuh tam ber kha chu opposition MLA te hna thawh a ni deuh vek a, ruling MLA te hmalakna hmuh ve tur hi a tam lo nge, an in theh lar ve thiam lo zawk?

Opposition MLA te khan vote zawn nan, an tih ṭhat an rawn pho chhuak a nih pawhin, thil ṭha tih chu vote zawn nan a ṭha reng a, intihhmuh chi a ni.

Insawi mam hi chu a awl, tual thattu ngei pawh a inpha mar thei, insawi mam ngai thil tih aiin, thil ṭha tih chhuan tur hi hnutchhiah zawk ila. Khu lamin an tih theih khu, he lamah seng luh i tum ve ang u.

- Lalrinliana Colney