Hnam dang ngai thei lo inti Mizote hian kan hlawkna turah hnam dang kan kawp

Tun hnaia Mizo nih ka zah ber chu kan NGO ten Chief Secretary Pi Renu Sharma hnam dang a nih vanga a office kal tur dan an tum thu leh Chief Secretary atan Mizo ngei tling an awm avanga Mizo ngei dah an duh a, hnam dang a nih vanga kan CS ni lai chhuahtir an tum kha a ni.

Mizote hian hnam dang ngaih theih loh hi kan tina em em a, hei hi thliarkar rilru dik tak kha a ni kan tih dawn chuan thil dangah hnam dang hi kan kawp fer fur bawk si hian ngaihtuah a ti thui a ni.

Laipuitlang veng­ah hian hnam dang hausa tak a awm a, chu pa chuan MLA inthlan dawn apiangin inleng hi a nei a, an lawm haw viau zel bawk a ni. Eng party pawh sorkar se a pawnlang thei lo an ti tih te kha a lo dik a nih ngei dawn hi.

Chief Minister Pu Zoram­thanga khan Assembly House zawhna chhannaah Kamrul Laskar-a ta, KR Construction hnenah kum 2018-19 aṭangin contract hna pakua an pek tawh thu a sawi a. Heng zinga pahnih chiah hi tender pangngai a ni a, hna pasarih hi induhsak theihna restricted tender hmangin an pe a, a hna hi cheng nuai 8,815.37 man a ni tih a sawi. Ani hian Mizote thawh thiam leh thawh phak chin bak a thawk thei a ni si lova, engvangin nge Kamrul-a hi kan NGO te hian an ngaimawh leh miah si loh le? tiin zawhna a lo kal hial thei ta ve ang.

Abu Mazumdar an tih pa kha Mizoram buhfai supplier lian tak a ni a, chu lai ni lovin Mizoram CM leh Assam CM inbiaknaah a lo tel ve zawk kha NGO lam hian ngaimawh tur a ni asin. Kan NGO hruaitute pawh an tel phak lohnaah Vai rama mi smuggler tia Assam sorkarin an um Abu Mazumdar hian Mizoramah buhfai a supply ṭhin a, Mizo pawhin an supply ve theih a nih avangin Abu Mazumdar-a supply tur hi dang zawk ang u.

Kan sports infra­structure lian pui pui an rawn chhawp chhuah te hi ngun takin lo en ve ula a satu tur hi Guwahati lam an ni deuh zel bawk a nia. Guwahati lam an nih tak tak leh tak tak loh chu an siamna khuate an chiang ber ang.

Sorkar hian hetia hnam dang chhawr leh hnam dang kawp ang chi a kalpui reng tho laia CS mi ṭha tak hnam dang a nih vanga ngaimawh hi chu a mak ngawt mai.

- Lalthlengliana Ralte