WORLD CLUBFOOT DAY : KE LEK (CLUBFOOT)

Vawiin June ni 3 hi khawvel pumah ‘World Clubfoot Day’ a ni. Kum 2005 bawr vel atanga ke lek a piangte (Clubfoot) enkawl dan tha ber ‘Ponseti Method’ hmuchhuaktu Dr. Ignacio Ponseti a pian ni denchhana World Clubfoot Day hi hman a ni. Ponseti Method ah hian insenso a tlem em em a, a hun taka enkawl chuan 95 % in a hlawhtling a ni.

Ke lek (Clubfoot) a piang chu a pian hlimah an ke hi a letling zawngin a kawm a, golf vuakna ang deuh hian a awm a, enkawl dam vat loh chuan kal pangngaiin an kal thei lo. Ponseti hmanga enkawl vat chuan awlsam taka tih dam theih a ni. Enkawl hun laia enkawl loh avanga damchhunga piangsualte, enkawl dan dik loh avanga zai tawk, pheikhawk pawh bun thei lo leh bun ngam lo khawp a ser nei chhunzawm te ka hriat nual avangin midangte tana hlawkna a nih theih nan a tak ngeia kan tawn hi midangte hian hriat a tan ka lo tarlang dawn a ni.

Ka vawikhat hriatna

Kan fa hmasa ber Presbyterian Hospital, Durtlanga May ni 31, 2014 khan ke lek (Clubfoot) in a pianga. Mi te chu fa an neihin hlimin an lawm a; kei erawh chu ka fapa piangsuala a pian avangin mittui nen ka fapa lo piang chuan min ti rilru hah thung. Duhsaktu ten min lawmpui a, an lo en te kha ka phur lo a. Ke lek (clubfoot) hi ka lo la hmelhriat miah lo a. Doctor leh nurse fel tak tak te chuan ke lek te chu enkawl vat a nih chuan a dam theih thu min hrilh chuan ka rilru chu tlemin a ti nuam ta deuh a.

Mizoramah enkawlna tha ber

Ka thiante leh chhungte fapa ka neih thu han hril te chu a phurawm lo in ka chak lo tak zet a. Mi nu leh pa te chuan an fa hmasa ber an neihin an hlim a, kei erawh chu ka hlim thei mawlh lo. Zan lamah chuan ke lek (Clubfoot) chungchang chu internet hmang chuan ka zirchiang ta a. Tih dam theih a nih leh nih loh te chu uluk takin google atang te chuan thu ziak hrang hrang ka chhiar a. Enkawl vat chuan tih dam theih a nih thu te ka hriat chhoh tak avang chuan ka lawmin beiseina ka nei chho ta zel a. Chumi zan vek chuan Mizoram sawrkar hmalakna a Mizoram Clubfoot Society lo awm tih te ka hre chho ta zel a, an coordinator biak pawh theihna number (8974054839) te chu Internet atang chuan ka hmu ta a . Zan lai a Co-ordinator Pi Laldinpuii phone mai te chu ka duh rum rum hial. Khawvar chu nghakin a thawh hun awm velah chuan ka be ta a. A lo felin biak a nuam kher mai. Ani chuan damdawiin kan chhuah veleh a tih dan tur leh anmahni nena in hmuh dan tur te chu ruahmanna min siam pui nghal zung zung a. Ka lawmna deuh chu , “Ponseti Method in Civil Hospitala ruh lam thiam doctor ten an enkawl vat ang a, rei lo te chhungin a tha vek ang. A tira enkawl vat chuan tha takin a dam vek ang” ti a Mizoram chhungah ngei enkawl dam theih a ni tih min hrilh kha a ni. Civil Hospital-ah Thursday apianga ke lek puala ruh lam thiam doctor te an thut thu te leh chumi buaipuitu sawrkar hnuaia pawl din Mizoram Clubfoot Society an awm thu te min hrilh chuan min ti thlamuang hle.

Engtin nge an enkawl

Tichuan, ani min thurawn ang chuan ka fapa damdawin atanga a chhuah atanga ke lek (Clubfoot) inentir ni hmasa ber May ni 22 (Thursday), 2014 chuan Aizawl Civil Hospital chu kan pan ta nghal a. Hemi ni hian kan fapa chu ni 9 leka upa chauh a la ni. Hemi ni hian ruh tliak an tuam khawngna (Plaster of Paris/POP) chuan ka fapa ke lek chu Dr Manghaka chuan uluk leh thiam takin a tuam sak a. A ke lek chu chutiang hmang chuan a ke tuam ni apiang chuan a lo adjust zel thin.

Khawvela ka hlim ni te min zawt dawn ta se, ka sawi hmaih miah loh tur chu ka fapa ke tuam an phel hmasak ber ni May ni 29, 2014 kha ka sawi ngei ang. A ke tuam an han phel kha ke pangngai ang mai hian a lo nghil nghal em em mai a, ka van lawm tak em! Chhungte leh thian tha te hnenah a thlalak chu ka thawn kual a. Ka fapa ke chu ni May ni 22, 29 leh June ni 5 te chuan kan tuam khawng a, kar khat chhung chu chutiang a tuam khawngna hmang chuan an hrem thin a. Thursday apiangin kan phelh a, an tuam tha leh thin a ni. A vawi li na June ni 12 ah chuan a ke hnunga tha tawm chu an thai ve leh a. Chumi chu an tuam hnan a, rei ve deuh hlek hnuah an phel ve leh a. Hemi an phelh meuh chuan naupiang pangngai ke nen danglamna pakhat mah hi a awm tawh lo, a lo pangngai vek tawh a ni.

Hemi hnu hian a bik taka siam pheikhawk chu hun rei tak kan bun leh a ni. Hemi pheikhawk hi kan bun that loh chuan ke lek kha lo awm leh thei a, bun that a ngai em em a ni.

A free vek enkawlna :

Khatih laia min buaipui ṭhintu Pi Madini, Dr Manghaka leh Dr Rinmawia te inpekna kha a ropuiṭ in theihnghilh theih hi a ni tawh lo. Dam lo dangte in-line angin nausen piang hlim ke lek (Clubfoot) te kha Thursday ah chuan kan in-line ve ngai lo a, engkim kha min lo ruahmansak nghal vek zel ṭhin. Thingtlang khua aṭanga lo kal harsat ve deuh phei chuan a fapa chu enkawl vat an duh avangin a kal leh haw sensote pawisa an pek thu min hrilh phei chuan ka rilru hi a khawih hle. Ka rin loh deuh maia hemi society a member a min lo ruat phei chuan lawm takin ka rawngbawlna tiin ka pawm hmiah a ni. Sum tam tak sena damna tur pawh ni se phai damdawiin tha ber ber pawh kan panna tur kha Mizoram ngeiah kan sawrkar damdawiinah a thlawnin min lo tih damsak vek kha a lawmawm duh em a ni.

Ponseti Method chu eng nge?:

Ponseti method hi a hmuchhuaktu Dr Ignacio Ponseti hian kum 1940 atang khan a lo hmang ṭan tawh a. Ponseti method ah chuan Nausen ke lek chu an tuam khawng a, a dik dan turin an siam rem a, chumi hnuah pheikhawk hemi atan siam bik an buntir leh ṭhin. Pian hlima hemi method hmanga enkawl vat chuan kar riat chhunga enkawl dam theih a ni. Ponseti method hi World Health Organization ten ke lek enkawlna tha berah an lo pawm daih tawh a. American Academy of Pediatrics, American Academy of Orthopedic Surgeons, Pediatric Orthopaedic Society of North America, European Pediatric Orthopedic Society leh khawvel ram lian 35 te chuan ke lek enkawl nana ṭha berah an lo pawm tawh bawk a ni.

Ke lek leh infiam mite :

Ke leka piang, an pian hlima enkawl vat dam leh ta infiam milar tak takte hi an awm nual a. Hmeichhe football thiam Mia Hamm, kum 2001 leh 2002 a hmeichhia FIFA World Player of the year a ni thei hi a pian hlima ke leka piang a ni a. Mizo ṭhalaiten kan ṭan em em Liverpool Captain ṭha leh tlanchak Steven Gerrard, England tana World Cup kum 206, 2010 leh 2014 a player rin rawl ber pawh hi ke leka piang a ni. Charles Woodson, American Football player ropui Super Bowl XXXVII pawha khawvel mit fukna ber hi ke lek apiang tihdam leh a ni a. Khawela skater ropui Olympic ah pawh Gold lo la tawhtu Kristi Yamaguchi pawh hi ke leka piang a ni.

Ke lek apiang hi an tam, enkawl vat chuan a dam thei:

BC 400 laiin hmanlai Egypt lal ropui Pharoah Siptah a kha ke leka piang niin history ah chuan hmuh a ni a. Naupiang 1000 zelah mi pali awm anga chhut a ni. Khawvel pumah kum tin ke lek naupang 150,000-200,000 piang ang chhut a ni. Naupiang hlim piansualna langsar tak a ni. Mipa naupiangah a tam bikzual. Phir an nih chuan a phir dang ke lekna chance 33 % a awm a niin an sawi a. Mipa bikah ke leka piang chu mipa a nih chuan ke leka pian leh na chance a sang. Heti khawpa ke leka piang hi tam ni mahse la pianhlima Ponseti Method hmanga enkawl vat chuan ke leka piang tih pawh hriat lohin an enkawl dam thei a ni.
Tun dinhmunah hian Aizawl Civil Hospital bikah hian Mizoram Clubfoot Society ten kan buaipui chinah naupang 97 (sawm kua pasarih) kan sawrkar doctor thiam tak tak ten Ponseti hmangin an enkawl dam tawh a. A enkawl man hi a thlawn vek a ni a. Aizawl lo pan thei lo harsa zualpui te chu an kal leh hawna thlenna turte an ngaihtuahsak ṭhin a. Ke lek a piang ni ngeia inhria an awm chuan helpline number 8575186293 ah hian in lo zawhfiah ṭhin dawn nia.

- JC Lalnunsanga, Member, Clubfoot Society of Mizoram