CYMA THILREL DAN HI ....AVA MAK EM!

Tun ṭuma CYMA kaihhruai NGO Co-ordination Committee-in kan Chief Secretary nilai, Dr. Renu Sharma (AGMUT '88), mi hmingṭha leh ṭhahnemngai taka thawk mek - Mizo a ni lo, Mizo ṭawng a thiam lo tih vel ṭanchhana hmanga nawrchhuah an tum ta mai hi a mak ka tiin pawi ka va ti em! Mizo a nih ve lohna hi sorkar dan bawhchhiatna tling a ni em? Sawi tur ava tam dawn ve!

A thuhrimin tuna CYMA member te hi lehkhathiam leh thil chinchang hre pha awm pui puite pawh an ni a, hetiang issue lian tham an rellai hian Cadre rules ilo an hre pha lo a nih pawhin hetiang hnam issue lian tham lutuk nghawng thei thil an kalpui hma hian a kaihhnawih dan awm thei te zirchian nachang hi chu hriat ve awm! Mi zirsang pui pui leh sorkar hnathawkte anni hlawm si a, National Integration (constitution) leh Conduct Rules (unbecoming to Govt.servants) thlirna mit aṭangin hengte hi a him reng em? tihte pawh hi an ngaihtuah thleng pha lo em ni le?

AGMUT (Arunachal Pradesh, Goa, Mizoram leh Union Territories zawng zawng) cadre-ah hian IAS (bik) te posting ilo chungchanga thutawp siamtheitu (top authority) chu Ministry of Home Affairs (MHA) hi a ni a, State cadre neiho (AGMUT ni lo) in Chief Secretary appointment hi chu state Chief Minister te duhthlan theihna (prerogative) ang deuha an ngaih ang hi a ni ve ngawt lo.

Tunah hian MHA-in ṭha a tih avanga a dah Dr. Renu Sharma hi kan CS aṭangin CYMA te hian lo nawrchhuak ta pawh ni se, MHA hian tu senior Mizo IAS officer nge Mizoram Chief Secretary atan min dahsak kan beisei? A hnaivai leh kan IAS senior ber Pu Lalbiaktluanga Khiangte (Jharkhand cadre '88) hi han beisei ngawt dawn ila, MHA leh Jharkhand state sorkar hian an remti dun thlap thei ang em? Amah pawhin a duh reng ang em? Bakah cadre state pawnlama sawnchhuah theihna Deputation Reserved (DR) hi Mizoramah a rawn awm khan a hmang zo tawh em le, lo hmang zo tawh ni tase engtingnge ni zel ang le?

Tichuan, kan Chief Secretary nilai Dr. Renu Sharma hi lo umchhuak ta tehreng pawh ni se, tun dinhmunah hian tu Mizo IAS senior officer nge mizoram CS atan kan beisei theih tak ang le tih te hi kan CYMA te hian an ngaihtuah thleng pha em?

Hetiang dinhmun a nihlai hian engatinge CYMA te hian hmanhmawh uchuak tak maia kan CS nilai hi chaltlai leh a tan pawha zahthlak tawpkhawk (humiliating) tak mai lehnghala nawrchhuah an tum tak chuk chuk le? A ṭuah tawh viau em ni? Hetianga kan sorkar hnuaia a hnathawh ṭhat ilo (integrity) zawng zawng dah bova state pawna nawrchhuah an tum a nih pawhin, hmeichhe awmnem pakhat hi a office kaltur dang buai (by-force)zawng kher lova tihdan te pawh a awm hmel tho a; hei hi chu a buluk mah mah!

Hman deuh savawm bawma inkhung chinlai te, tunhnaia Afgha­nistan a Taliban firfiakho roreldan te pawh kan hriatchhuah phah rum rum mai dawn alawm le! Kei chu ka hriatthiamna in a tlin ve miah lo.

CYMA thiltih dan but but hi a Mizo lo a, a YMA hotu an ni nain a YMA lo hle bawk! Kan Mizo IAS, state danga ṭha te te a hnathawk mekte hi vaiṭawng a thiam tawk lo' tiin an state miten rawn hnawt chhuak mai se engtinnge keini hian kan dawnsawn ve ang le? Dik tak chuan state dangte mithmuha ka nep lulai tawh nak a laia hetianga mahni tapchhak zawl aṭanga lo inlulin ve em em ringawt zel mai hi kan hmuhsitawmna belhchhahtu mai a ni. Engatinge heng kan NGOs te hi firfiak pawl ang maia hnam inlungrualna (communal harmony) tichhe zawnga an kal tak tlat mai le? He an thiltih, (Mizoṭawng a thiam lo) tia an nawrchhuah tum dan hi National integration vawngnung tur kan nihna nen pawh a va inrem lo ve!

Lehlam zawnga ngaihtuah phei chuan he thil hi sorkar kaltluang pangngai tihbuai tum hrim hrimte thiltih te pawh an ang thei zawk rum rum alawm le!

Hnamdang mithmuhah tuna CYMA te thiltih hian thliarkar rilru pu leh communal feeling ngah lutuk angah Mizote hi min ngaih phah ngei ang le! (He thil zahthlak tak hi Dr. Renui telna IAS whaps gr etc? ah phei chuan thu benglut tak tur niin tunah hian India ram puma All India Service (IAS, IPS, IFoS) officers ho zawng zawng hian an lo hre vek tawh lovang tih tunge sawi thei?). He thil hi CYMA irawm chhuak liau liaua hmalakna nge a phenah molecule kawihsapir a lo tawm ru khiau zawk? Hetianga an nawr rum rum duhna rilru (logic) hrim hrim pawh hi ka hre chiang chak mang e...

Lehlam zawnga ngaihtuah chuan heng an thiltih te hi dan tarmit (IPC, Conduct Rules, etc) aṭanga thlir phei chuan he thila inhnamhnawih zawng zawng hi an ṭingmit dial theih vek mai em? tih pawh hi hlauhthawnawm tham tak a ni tho thei bawk.

Awle, he ka thuziak hi NGO Co-ordination te dem tumna ni ber lovin tua te pawhin nakina Mizo hnam issue la khawih thei thil kan ngaihtuah dawn (movement siam dawn) reng rengin kan inzirchian hmasak a ṭul thu te, hnawhsarum leh a haw haw zawnga thil ngaihtuah bansan hret hret ila. Mahatma Gandhi-a Policy ang deuhin rumra taka sual bawrh bawrh mai lovin, a zai ngai te tein aw ni ang... non-violence the means justifies the end (not the end justifies the means) ang zawnga ngaihtuahna hman ka duh leh beisei vanga ziak ka ni ber.

- Lalrinmawia IFS (Rtd)